Mashhur yangiliklar
Turkiya Respublikasining eksport mahsulotlari ko‘rgazmasi ishtirokchilariga
Hurmatli ko‘rgazma ishtirokchilari!
Aziz mehmonlar!
Sizlarni “Mustaqil, doimiy betaraf Turkmaniston — shiddatli otlar vatani” yilida Ashxobod shahrida o‘tkazilayotgan Turkiya Respublikasining eksport mahsulotlari ko‘rgazmasining ochilishi bilan chin dildan tabriklayman.
Hozirgi vaqtda Turkiya Respublikasi mamlakatimizning yirik savdo-iqtisodiy hamkorlaridan biri hisoblanadi. Turkiya kompaniyalari turkman hamkorlari bilan yaqindan hamkorlik qilib, iqtisodiyotning turli sohalarida bir qator qo‘shma loyihalarni muvaffaqiyatli amalga oshirmoqda hamda ishbilarmonlik sohasidagi samarali hamkorlikni kengaytirmoqda. Bu holat tarixiy ildizlari asrlar qa’riga borib taqaladigan va “ikki davlat — bir millat” tamoyiliga asoslangan do‘stona turkman va turk xalqlari o‘rtasidagi izchil rivojlanib borayotgan ko‘p qirrali munosabatlarda yaqqol namoyon bo‘lmoqda.
Turkmanistonda investitsiyalar, tadbirkorlik, tashqi savdo va qo‘shma iqtisodiy hamkorlik uchun yaratilayotgan qulay sharoitlar turkman-turk munosabatlarini yanada rivojlantirish uchun katta imkoniyatlar ochib bermoqda.
Hurmatli mehmonlar!
Aziz do‘stlar!
Turkmaniston va Turkiyada milliy mahsulotlarning o‘zaro ko‘rgazmalari, ishbilarmonlar uchrashuvlari va forumlarning muntazam o‘tkazilishi turli sohalarda davlat va xususiy sektor vakillari o‘rtasidagi aloqalarning faollashuviga ijobiy ta’sir ko‘rsatmoqda. Natijada Turkiya Respublikasi Turkmaniston tashqi savdo aylanmasida muhim o‘rin egallaydi. Bugun o‘z ishini boshlayotgan ko‘rgazmada Turkiya kompaniyalarining qishloq xo‘jaligi, oziq-ovqat sanoati, qurilish, sanoat uskunalari ishlab chiqarish, energetika, kimyo sanoati, tibbiyot, ta’lim va fan sohalarida erishgan yutuqlari, ilg‘or tajribalari, innovatsion tashabbuslari va ishlanmalari keng namoyish etiladi. Ko‘rgazmada Turkmanistonda faoliyat yuritayotgan hamkorlarimiz bilan bir qatorda, o‘z mahsulotlarini ilk bor taqdim etayotgan kompaniyalar ham ishtirok etmoqda. Bu esa ikki do‘st davlat ishbilarmon doiralarining uzoq muddatli va o‘zaro manfaatli hamkorlikka bo‘lgan katta qiziqishini yana bir bor yaqqol ko‘rsatadi.
Mazkur ko‘rgazma Turkmaniston va Turkiya Respublikasi o‘rtasidagi ikki tomonlama savdo-iqtisodiy hamkorlikni kengaytirish, tovar ayirboshlash hajmini oshirish, turk kompaniyalari va investorlar bilan ishbilarmonlik aloqalarini yanada rivojlantirish hamda milliy iqtisodiyotimizga investitsiyalarni keng jalb etishda muhim ahamiyat kasb etishiga qat’iy ishonaman.
Ko‘rgazma ishtirokchilari!
Hurmatli mehmonlar!
Sizlarni Turkiya Respublikasining eksport mahsulotlari ko‘rgazmasining ochilishi bilan yana bir bor samimiy tabriklayman. Sizlarga mustahkam sog‘liq, farovonlik hamda turkman va turk xalqlari o‘rtasidagi do‘stlik, qardoshlik va o‘zaro hurmat tamoyillariga asoslangan ko‘p qirrali munosabatlarni rivojlantirish yo‘lidagi olijanob faoliyatingizda katta muvaffaqiyatlar tilayman.
Turkmaniston Prezidenti
Serdar BERDIMUHAMEDOV
