Tadbirkor Bashim Sopiyevning Oq bug‘doy tumanida joylashgan chorvachilik majmuasida hozirgi vaqtda yuqori sut berishi bilan tanilgan “simmental” va “golshtin” zotlariga mansub 820 dan ortiq yirik shoxli mollar parvarish qilinmoqda. Bu haqda dushanba kuni chop etilgan “Rysgal” gazetasida xabar berildi. Tadbirkor Bashim Sopiyev bir necha yildan beri Oq bug‘doy tumanidagi mavjud fermani ijaraga olib, uning moddiy-texnik bazasini va mollar zotini takomillashtirish orqali ushbu murakkab sohadagi tajribasini oshirib kelmoqda. Xabarda ta’kidlanganidek, amaldagi chorvachilik majmuasidan bir necha kilometr uzoqlikda yanada quvvatli inshoot qurilishi jadal sur’atlarda davom etmoqda. Bu yerda tadbirkor Bashim Sopiyevga uzoq muddatga ajratib berilgan 250 gektar maydonning 10 gektarida zamonaviy chorvachilik majmuasi qurilmoqda. 5000 ga yaqin nasldor mollarni parvarish qilish imkonini beradigan yangi majmuada har bir molning sog‘lig‘i, oziqlanishi va harakatini maxsus datchiklar orqali nazorat qilish uchun texnologiyalar hamda avtomatlashtirilgan sog‘ish uskunalarini o‘rnatish ko‘zda tutilgan. Loyihaga muvofiq, ferma hududida sigirxonalar, go‘sht yo‘nalishidagi mollarni boqish uchun binolar, sut sog‘ish bo‘limi, yem omborlari, silos maydonchalari, texnikalar uchun garaj, qorovulxona va mollarni saqlash binolari, so‘yimxona, transformator binosi, xo‘jalik ehtiyojlari uchun binolar, hovuzlar, mahsulotni qayta ishlash sexi hamda tayyor mahsulot ombori, dezinfeksiya to‘siqlarini qurish rejalashtirilgan. Chorvachilik majmuasi ishga tushirilishi bilan mahalliy aholi uchun 100 ga yaqin yangi ish o‘rinlari yaratiladi. Shuningdek, mavsumiy qishloq xo‘jaligi ishlarini bajarish uchun qo‘shimcha 100 dan ortiq kishiga ish joylari ochiladi.