Turkmanboshi xalqaro dengiz portini modernizatsiya qilish masalalari muhokama qilindi

Turkmaniston dengiz va daryo transporti davlat xizmati vakillari hamda BMT Taraqqiyot Dasturining (BMTTD) Turkmanistondagi doimiy vakili Narine Saakyan uchrashuv davomida Kaspiyorti transport yo‘lagining muhim bo‘g‘ini sifatida Turkmanboshi xalqaro dengiz portini modernizatsiya qilish bo‘yicha hamkorlik imkoniyatlarini muhokama qildilar.

Xususan, savdo amaliyotlarini soddalashtirish va zamonaviy raqamli tizimlarni joriy etish bo‘yicha o‘zaro hamkorlik masalalari ko‘rib chiqildi. BMTTD tomonidan taqdim etilgan Konseptual notaga muvofiq, mavjud Terminalni boshqarish tizimini (TOS) takomillashtirish va “Dengiz yagona oynasi” (MSW) tizimini joriy etish masalalariga alohida e’tibor qaratildi, deb xabar beradi tmrl.gov.tm sayti.

Shuningdek, port ega bo‘lgan ISO-14001 va “Ekoport” sertifikatlarining ahamiyati ta’kidlanib, xalqaro ekologik standartlarni yanada oshirish bo‘yicha yangi takliflar ilgari surildi.

Davlat xizmati vakillari ushbu tashabbus va loyihalar Turkmaniston Vazirlar Mahkamasi muhokamasiga havola qilinishini ma’lum qildilar.