Turkmaniston bilan O‘zbekiston o‘rtasidagi strategik hamkorlik yangi bosqichga chiqmoqda
Kecha muhtaram Prezidentimiz Serdar Berdimuhamedov mamlakatimizga tashrif bilan kelgan O‘zbekiston Respublikasi tashqi ishlar vaziri Baxtiyor Saidovni qabul qildi.
Mehmon uchrashuv uchun yaratilgan imkoniyatdan chin dildan minnatdorlik bildirib, O‘zbekistonda Turkmaniston bilan aloqalarni rivojlantirishga katta ahamiyat berilayotganini ta’kidladi hamda fursatdan foydalanib, O‘zbekiston Prezidenti Shavkat Mirziyoyevning davlatimiz rahbariga hamda Qahramon Arkadagimizga yo‘llagan samimiy salomi va eng ezgu tilaklarini yetkazdi.
Muhtaram Prezidentimiz O‘zbekiston davlat rahbariga eng ezgu tilaklarini bildirib, mehmonning ushbu tashrifi Turkmaniston bilan O‘zbekiston o‘rtasidagi ikki tomonlama hamkorlikni rivojlantirish uchun yangi imkoniyatlar ochishini aytdi.
Uchrashuv davomida ta’kidlanganidek, turkman-o‘zbek aloqalari o‘zaro ishonch va hurmatning yuqori darajasi bilan ajralib turadi. Bu mustahkam poydevor strategik hamkorlikni izchil mustahkamlash borasida sa’y-harakatlarni birlashtirish imkonini beradi. Mamlakatlarimiz Birlashgan Millatlar Tashkiloti, Mustaqil Davlatlar Hamdo‘stligi, Iqtisodiy Hamkorlik Tashkiloti kabi xalqaro tashkilotlar doirasida samarali hamkorlik qilmoqda. Umumjahon tinchligi va barqaror rivojlanishni ta’minlashga qaratilgan tashabbuslarning o‘zaro qo‘llab-quvvatlanishi buning yaqqol namunasidir.
Muhtaram Prezidentimiz mintaqaviy tuzilmalar, xususan, “Markaziy Osiyo +” shaklidagi muvaffaqiyatli hamkorlikni alohida ta’kidlab, bu tuzilmalar muloqotni chuqurlashtirishda, ko‘p tomonlama iqtisodiy hamkorlikni rivojlantirishda samarali maydon bo‘lib xizmat qilayotganini qayd etdi hamda Turkmanistonning ijobiy Betaraflik tamoyillariga asoslangan tashqi siyosatini izchil qo‘llab-quvvatlayotgani uchun o‘zbek tomoniga minnatdorlik bildirdi.
Turkmanistonning Mustaqil Davlatlar Hamdo‘stligida raislik qilayotgan davrida “Avaza” milliy sayyohlik zonasida MDH Davlat rahbarlari kengashining navbatdagi majlisi, shuningdek, Markaziy Osiyo mamlakatlari va Ozarbayjon Respublikasi davlat rahbarlarining maslahat uchrashuvi bo‘lib o‘tadi. Shu munosabat bilan Arkadagli Qahramon Serdarimiz bu tadbirlar mintaqaviy hamkorlikni, o‘zaro ishonch va yaxshi qo‘shnichilikni mustahkamlashga xizmat qilishini, shuningdek, turkman-o‘zbek strategik hamkorligini rivojlantirishga turtki berishini ta’kidladi.
Turkmaniston O‘zbekiston Respublikasi bilan aloqalarni har tomonlama rivojlantirishga katta ahamiyat bermoqda. An’anaga ko‘ra, savdo-iqtisodiy, shu jumladan energetika, transport-logistika kabi strategik tarmoqlar o‘zaro hamkorlikning asosiy yo‘nalishlari hisoblanadi. Bu boradagi sa’y-harakatlarni birlashtirishda Turkman-o‘zbek savdo-iqtisodiy, ilmiy-texnikaviy va madaniy hamkorlik bo‘yicha qo‘shma komissiya ishiga alohida o‘rin ajratilgan.
Madaniy-gumanitar soha davlatlararo muloqotning ajralmas qismidir. Xalqlarimizni ko‘p asrlik do‘stlik, birodarlik, yaxshi qo‘shnichilik munosabatlari hamda madaniy va ma’naviy qadriyatlarning mushtarakligi bog‘lab turadi. Shu munosabat bilan davlatimiz rahbari turli madaniy tadbirlarni o‘tkazish orqali bu hamkorlikni kelgusida ham rivojlantirish muhimligiga e’tibor qaratdi.
Uchrashuv so‘ngida muhtaram Prezidentimiz Serdar Berdimuhamedov Turkmaniston O‘zbekiston bilan aloqalarga yuksak baho berishini va ikki davlat qardosh xalqlari manfaati yo‘lida samarali hamkorlikni kelgusida ham rivojlantirishni maqsad qilganini tasdiqlab, O‘zbekiston Respublikasi tashqi ishlar vaziri Baxtiyor Saidovga mustahkam sog‘liq, farovonlik va ishlarida muvaffaqiyatlar tiladi.
