2026-yil noyabr oyida Turkmaniston Turkiyaning Antaliya shahrida bo‘lib o‘tadigan BMTning Iqlim o‘zgarishi to‘g‘risidagi doiraviy konvensiyasi Tomonlarining 31-konferensiyasi (COP31) doirasida milliy pavilon bilan ishtirok etadi.

Milliy pavilonda mamlakatning atrof-muhitni muhofaza qilish, iqlim o‘zgarishi bilan bog‘liq muammolarni hal etish va xalqaro ekologik tashabbuslarni amalga oshirish borasidagi yutuqlari namoyish etiladi. Milliy ko‘rgazma tayyorgarlik ishlarini Turkmaniston Vazirlar Mahkamasi Raisining o‘rinbosari Nokerguli Atagulyev muvofiqlashtirmoqda. U 31-oktabr kuni bo‘lib o‘tgan Hukumat majlisida amalga oshirilayotgan ishlar haqida hisobot berdi.

Konferensiyada issiqxona gazlari chiqindilarini kamaytirish, iqlim o‘zgarishi oqibatlariga moslashish va ekologik tahdidlarga nisbatan barqarorlikni oshirish masalalariga alohida e’tibor qaratiladi. Shuningdek, Parij kelishuvini amalga oshirish, iqlimni moliyalashtirish imkoniyatlarini kengaytirish, ekologik texnologiyalarni joriy etish va xalqaro hamkorlikni rivojlantirish masalalari muhokama qilinadi.

COP31 doirasida rivojlanayotgan mamlakatlarning milliy iqlim maqsadlarini investitsiya loyihalariga aylantirishga ko‘maklashuvchi «Climate Implementation Bridge» yangi tashabbusini ilgari surish ham rejalashtirilgan.

Antaliyada o‘tkaziladigan xalqaro konferensiya Turkmanistonning ekologik diplomatiyasi, atrof-muhitni muhofaza qilish borasidagi tajribasi va xalqaro tashabbuslarini jahon hamjamiyatiga tanishtirish uchun muhim maydon bo‘ladi.