Turkmaniston Davlat xavfsizlik kengashining majlisi

Kecha Turkmaniston Prezidenti, mamlakat Qurolli Kuchlarining Oliy Bosh Qo‘mondoni, armiya generali Serdar Berdimuhamedov Davlat xavfsizlik kengashining majlisini o‘tkazdi. Unda joriy yilning ikki oyi davomida mamlakatimiz harbiy va huquqni muhofaza qiluvchi organlarida amalga oshirilgan ishlarning natijalari ko‘rib chiqildi. Shuningdek, mustaqil davlatimizda xavfsizlik va osoyishtalikni ta’minlash, harbiy va huquqni muhofaza qiluvchi organlarning moddiy-texnik bazasini mustahkamlash hamda faoliyatini yanada takomillashtirishga oid bir qator masalalar muhokama qilindi.

Dastlab Davlat xavfsizlik kengashi kotibi, mudofaa vaziri B.Gundogdiyev Turkmaniston Qurolli Kuchlarini rivojlantirish dasturida ko‘zda tutilgan vazifalarni muvaffaqiyatli bajarish bo‘yicha yil boshidan buyon amalga oshirilgan ishlar haqida hisobot berdi. Shuningdek, Vatan himoyachilarining xizmat va yashash sharoitlarini yaxshilash, ofitserlarning malakasini oshirish borasidagi ishlar haqida so‘z yuritildi. Muhtaram Prezidentimiz hisobotni tinglab, Milliy armiyani rivojlantirishda dunyoning ilg‘or tajribalarini o‘rganish muhimligini ta’kidladi va aniq topshiriqlar berdi.

Bosh prokuror B.Muhamedov milliy qonunchilikka rioya etilishini nazorat qilish, raqamli tizimlardan foydalanish va xodimlarning malakasini oshirish bo‘yicha amalga oshirilgan ishlar yuzasidan axborot berdi. Oliy Bosh Qo‘mondon qonuniylikni mustahkamlash va fuqarolarning huquqlarini ta’minlash bo‘yicha ko‘rsatmalar berdi.

Ichki ishlar vaziri M.Xidirov o‘tgan ikki oyda huquq-tartibotni mustahkamlash, huquqbuzarliklar va yo‘l-transport hodisalarining oldini olish, yong‘in xavfsizligi qoidalariga rioya etish bo‘yicha ko‘rilgan choralar haqida hisobot berdi. Davlat rahbari jamoat tartibini saqlash bo‘yicha ishlarni samarali davom ettirishni topshirdi.

Oliy sud raisi B.Xojamquliyev sud tizimini takomillashtirish, raqamli tizimni joriy etish va berilgan topshiriqlarning ijrosi haqida hisobot berdi. Prezidentimiz fuqarolarning huquqlarini himoya qilish va sud idoralari ishining sifatini oshirish zarurligiga e’tibor qaratdi.

Milliy xavfsizlik vaziri D.Meredov yanvar-fevral oylarida tinchlik va osoyishtalikni ta’minlash borasida amalga oshirilgan chora-tadbirlar haqida ma’lumot berdi. Oliy Bosh Qo‘mondon konstitutsiyaviy tuzumni va milliy manfaatlarni himoya qilish bo‘yicha topshiriqlar berdi.

Davlat chegarasini qo‘riqlash xizmati boshlig‘i I.Ilamanov chegaralarning daxlsizligini ta’minlash va moddiy-texnik bazani mustahkamlash haqida hisobot berdi. Prezidentimiz davlat chegarasi do‘stlik va birodarlik chegarasi ekanini ta’kidlab, uning himoyasini kuchaytirishni tayinladi.

Adliya vaziri M.Taganov qonunchilikni takomillashtirish va raqamlashtirish bo‘yicha amalga oshirilgan ishlar haqida ma’lumot berdi. Davlat rahbari fuqarolarga qonun hujjatlarini tushuntirish bo‘yicha targ‘ibot ishlarini olib borish zarurligini aytdi.

Davlat bojxona xizmati raisi M.Xudaykuliyev va Davlat migratsiya xizmati raisi A.Sazakov o‘z yo‘nalishlari bo‘yicha hisobot berdilar. Prezidentimiz bojxona nazoratini samarali tashkil etish va migratsiya xizmatlari sifatini oshirish bo‘yicha ko‘rsatmalar berdi.

Majlis yakunida Muhtaram Prezidentimiz Mudofaa doktrinasiga muvofiq, mamlakat xavfsizligini ta’minlash va harbiy xizmatchilarning ijtimoiy sharoitlarini yaxshilash ishlari davom ettirilishini ta’kidladi va barchaga muvaffaqiyatlar tiladi.