Turkmaniston kompaniyasi tuyaqushlar sonini 10 mingga yetkazishni rejalashtirmoqda

Axal viloyatining Oq bug‘doy tumanida joylashgan “Düýeguş” (Tuyaqush) ishlab chiqarish majmuasida hozirgi vaqtda 2 mingga yaqin tuyaqush parvarish qilinmoqda, kelajakda bu yerdagi qushlar sonini 10 mingga yetkazish rejalashtirilmoqda. Bu haqda chorshanba kuni chop etilgan “Bereketli toprak” gazetasida xabar berildi.

“Zamonaviy uskunalar bilan jihozlangan inkubatsiya bo‘limida havo harorati va namligi me’yorda saqlanadi. Bu yerda tuyaqush tuxumlari 42—46 kun davomida inkubatsiya qilinadi. Tuyaqush jo‘jalari 3 oylik bo‘lguncha maxsus sharoitlar yaratilgan bo‘limda saqlanadi”, — deydi ishlab chiqarish majmuasi direktori Velmirat Velmiradov.

Majmua hududida tuyaqushlarni saqlash uchun keng kataklar, qushlarning sayr qilishi uchun maydonchalar, yem sexi va omborlar, qush go‘shtini tayyorlash, tuyaqush terisini qayta ishlash, patlarni yig‘ish uchun ishlab chiqarish bo‘limi, shuningdek, veterinariya punkti va ma’muriy bino faoliyat ko‘rsatmoqda.

Tuyaqushlar mart oyidan oktyabr oyigacha tuxum qo‘yadilar. Tuyaqush tuxumining vazni 1,2—2 kilogramm oralig‘ida bo‘lib, 25—30 ta tovuq tuxumining o‘rnini bosadi.

Xabarda ta’kidlanishicha, 1 kilogramm tuyaqush go‘shtini olish uchun qoramol va qo‘y-echkilarnikidan ko‘ra kamroq yer, kamroq yem va kamroq suv sarflanadi. Tuyaqushlar bor-yo‘g‘i 10—12 oyda so‘yimga tayyor vaznga yetadi. Bir qushdan o‘rtacha 40—45 kilogramm go‘sht olinadi.

“Düýeguş” ishlab chiqarish majmuasi 2022-yilda tashkil etilgan bo‘lib, tuyaqushlar uchun zarur sharoitlarni hisobga olgan holda qurilgan zamonaviy agrosanoat korxonasidir.