Turkmaniston Markaziy Osiyo va Britaniya o‘rtasidagi hamkorlikni mustahkamlash tashabbuslarini ilgari surdi

Turkmaniston Buyuk Britaniya Tashqi ishlar vazirligining “Lancaster House” hukumat majmuasida 26-fevral kuni bo‘lib o‘tgan tashqi ishlar vazirlari yig‘ilishida Markaziy Osiyo mamlakatlari va Buyuk Britaniya o‘rtasidagi hamkorlikni rivojlantirish bo‘yicha qator tashabbuslar bilan chiqdi. Bu haqda Turkmaniston TIV xabar berdi.

Turkmaniston tashqi ishlar vaziri Rashid Meredov o‘z nutqi davomida dunyodagi qiyinchiliklarga samarali javob bera oladigan, barqaror va raqobatbardosh iqtisodiyotni shakllantirishni taklif qildi. Energetika va metan chiqindilarini kamaytirish, jumladan, neft-gaz sohasini modernizatsiya qilish, uglevodorodlarni chuqur qayta ishlashni rivojlantirish hamda qayta tiklanadigan energiya manbalarini joriy etish asosiy ustuvor yo‘nalishlar sifatida belgilandi.

Uchrashuv davomida Londonning dunyoning yetakchi moliya markazlaridan biri sifatidagi imkoniyatlaridan foydalangan holda moliya va savdo texnologiyalari sohasida hamkorlikni kengaytirishga, shuningdek, huquqiy, konsalting va audit xizmatlari kabi professional xizmatlarni rivojlantirishga alohida e’tibor qaratildi.

Shuningdek, uchrashuv ishtirokchilari transport-logistika hamkorligini mustahkamlash va mintaqaning tranzit salohiyatini oshirish bo‘yicha fikr almashdilar.

Rashid Meredov nutqi yakunida Turkmaniston yangi ko‘ptaraplama format doirasida hamda ikkitaraplama asosda amaliy va o‘zaro manfaatli natijalarga qaratilgan faol va mazmunli hamkorlikka tayyorligini tasdiqladi. Majlisda mintaqaviy va xalqaro kun tartibidagi dolzarb masalalar ham muhokama qilindi.

Shu kuni Turkmaniston tashqi ishlar vaziri Rashid Meredov boshchiligidagi turkman delegatsiyasi London Universitet kolleji (UCL) Arxeologiya instituti professori Timoti Uilyams bilan uchrashuv o‘tkazdi. Uchrashuv natijalari bo‘yicha Turkmaniston Madaniyat vazirligi bilan UCL Arxeologiya instituti o‘rtasida Bitim imzolandi.