Turkmaniston Mejlisining Raisi va Ozarbayjon Milliy Majlisi Raisi o‘rtasida uchrashuv bo‘lib o‘tdi

2025-yil 4-avgust kuni Birlashgan Millatlar Tashkilotining Dengizga chiqish yo‘li bo‘lmagan rivojlanayotgan davlatlar bo‘yicha uchinchi konferensiyasi doirasida “Awaza” milliy turizm zonasida Turkmaniston Mejlisining Raisi D. Gulmanova bilan Ozarbayjon Respublikasi Milliy Majlisi Raisi S. Gafarova o‘rtasida uchrashuv bo‘lib o‘tdi.

Turkmaniston Mejlisining rasmiy saytida berilgan xabarga ko‘ra, S. Gafarova konferensiya doirasida tashkil etilgan tadbirlarning ahamiyatiga e’tibor qaratdi hamda Parlament forumi kelgusida tegishli yo‘nalishlarda parlamentlararo hamkorlikni faollashtirishga ijobiy ta’sir ko‘rsatishini ta’kidladi.

Uchrashuv davomida Ozarbayjon Milliy Majlisi Raisi yaqinda Turkman xalqining Milliy Lideri, Turkmaniston Halk Maslahaty Raisi Gurbanguly Berdimuhamedovning Ozarbayjonga amalga oshirgan tashrifining muhimligini alohida qayd etdi. Shuningdek, o‘zaro manfaat, tenglik, do‘stlik va birodarlik tamoyillariga asoslangan Turkmaniston-Ozarbayjon hamkorligining ajralmas qismi bo‘lgan parlamentlararo muloqotning izchil rivojlanib borayotgani ta’kidlandi.

Xabarda aytilishicha, tomonlar ikki do‘st davlat o‘rtasidagi hamkorlikni barcha sohalarda bundan buyon ham rivojlantirishga ishonch bildirdilar.