Turkmaniston TIV rasmiy saytini yangiladi

Turkmaniston Tashqi ishlar vazirligi rasmiy saytining tuzilishi va funksional imkoniyatlarini zamonaviylashtirib, uni yangiladi. Mamlakatning chet eldagi diplomatik vakolatxonalariga tegishli bo‘limlarga alohida e’tibor qaratildi.

Ta’kidlanishicha, yangilangan tizim foydalanuvchilar uchun yanada qulay bo‘ldi: navigatsiya yaxshilandi, elchixonalar va konsulliklar faoliyati haqidagi ma’lumotlardan foydalanish soddalashtirildi, shuningdek, muhim ma’lumotlarni olish imkoniyatlari kengaytirildi.

Yangi bo‘limlarda Turkmanistonning diplomatik vakolatxonalari, ularning aloqa ma’lumotlari, ish yo‘nalishlari va ko‘rsatilayotgan xizmatlar haqida ma’lumotlar joylashtirildi. Bu esa fuqarolar va xorijiy hamkorlarga kerakli ma’lumotlarni tezroq topish imkonini beradi.

Saytning yangilanishi tashqi siyosat mahkamasining ochiqligi va samaradorligini oshirishga, shuningdek, diplomatiya sohasida raqamli xizmatlarni rivojlantirishga qaratilgan.