Turkmaniston va AQSh strategik muloqotni kuchaytirmoqda: Rashid Meredov Vashingtonda uchrashuv o‘tkazdi
Ameriqa Qo‘shma Shtatlarida rasmiy tashrif bilan bo‘lib turgan Turkmaniston Tashqi ishlar vaziri Rashid Meredov hamda AQSh Davlat kotibining o‘rinbosari Kristofer Landau o‘rtasida yuqori darajadagi uchrashuv bo‘lib o‘tdi. Vashington shahrida tashkil etilgan ushbu muzokaralar davomida tomonlar ikki mamlakat o‘rtasidagi hamkorlikning bugungi holati va uni yangi bosqichlarga ko‘tarish yo‘nalishlarini atroflicha muhokama qildilar.
Uchrashuvda asosiy e’tibor ikki tomonlama munosabatlarni siyosiy-diplomatik, savdo-iqtisodiy, ta’lim hamda madaniy-gumanitar sohalarda bundan buyon ham faol rivojlantirishga qaratildi.
Diplomatlar o‘tgan yilning noyabr oyida Vashingtonda tashkil etilgan «C5+1» sammitining, shuningdek, Turkmaniston va AQSh Prezidentlari o‘rtasida bo‘lib o‘tgan ikki tomonlama uchrashuvlarning tarixiy ahamiyatini mamnuniyat bilan qayd etdilar. Ushbu uchrashuvlar va erishilgan kelishuvlar Ashxobod va Vashington o‘rtasidagi munosabatlarga kuchli turtki berganligi alohida ta’kidlandi.
Muzokaralar davomida savdo-iqtisodiy hamkorlikni mustahkamlash va Amerika ishbilarmonlar doiralari bilan aloqalarni kengaytirish masalalariga katta ahamiyat berildi. Shu munosabat bilan, turkman xalqining Milliy Lideri, Turkmaniston Xalq Maslahati Raisi Gurbanguly Berdimuhamedovning AQShga amalga oshirgan tashrifi doirasida Amerikaning yirik kompaniyalari vakillari bilan o‘tkazgan mazmunli uchrashuvlari qo‘yilgan vazifalarni hayotga tatbiq etishda yuksak o‘rin tutishi qayd etildi.
Tomonlar kelgusidagi hamkorlikning aniq qadamlari doirasida, AQSh ishbilarmonlar delegatsiyasining Turkmanistonga tashrifiga hamda Ashxobodda bo‘lib o‘tadigan har yilgi ikkitomonlama siyosiy maslahatlashuvlarga tayyorgarlik ko‘rish masalalarini ko‘rib chiqdilar.
Uchrashuv yakunida tomonlar ikki mamlakat va ularning xalqlari manfaatlariga javob beradigan o‘zaro hamkorlikni yanada mustahkamlash uchun muntazam va faol muloqotni davom ettirishga to‘liq tayyor ekanliklarini yana bir bor qat’iy tasdiqladilar.
