Turkmaniston va Germaniya kompaniyasi neft-gaz sohasida hamkorlikni chuqurlashtirishga qiziqish bildirdilar

Turkmaniston poytaxti Ashxobodda “Türkmengaz” va “Türkmennebit” davlat konsernlari rahbarlari Germaniya Federativ Respublikasining “BASF Group” konserni tarkibiga kiruvchi, Shveytsariyada joylashgan “BASF Intertrade AG” kompaniyasining biznesni rivojlantirish bo‘yicha rahbari Viktor Nikitin bilan uchrashuv o‘tkazdilar. Uchrashuvda ikki tomonlama munosabatlarni rivojlantirishning muhim yo‘nalishlari ko‘rib chiqildi.

Turkmaniston rasmiy ommaviy axborot vositalarining dushanba kungi xabariga ko‘ra, tomonlar o‘zaro manfaatli aloqalarni kengaytirishga tayyor ekanliklarini va neft-gaz sohasida hamkorlikni chuqurlashtirishga katta qiziqish bildirayotganliklarini tasdiqladilar.

Uchrashuv ishtirokchilari avval erishilgan kelishuvlarning bajarilishini ko‘rib chiqdilar, joriy holatga to‘xtalib o‘tdilar hamda qiziqtirgan masalalar bo‘yicha munosabatlarni rivojlantirishning istiqboldagi imkoniyatlarini muhokama qildilar. Shu bilan birga, tomonlar o‘z takliflarini bayon etib, ularni o‘rganish yaqin kelajakdagi rejalarni amalga oshirishga xizmat qilishiga ishonch bildirdilar.

“BASF” kompaniyasi Turkmanistondagi mintaqaviy loyihalarda faol ishtirok etib kelmoqda. Kompaniyaning gazni tozalash uskunalari Qiyanlidagi yangi gaz-kimyo majmuasi uchun tanlab olingan. Zarur hollarda kompaniya texnik ko‘mak va maslahat xizmatlarini ko‘rsatishi mumkin. Uchrashuv davomida tomonlar ushbu yo‘nalishda hamkorlikni rivojlantirish bo‘yicha batafsil fikr almashdilar.