Turkmaniston va Xalqaro mehnat tashkiloti o‘rtasidagi hamkorlikning istiqbolli yo‘nalishlari muhokama qilindi

2026-yil 12-mart kuni Turkmaniston Tashqi ishlar vaziri o‘rinbosari M. Bashimova hamda Xalqaro mehnat tashkilotining (XMT) Yevropa va Markaziy Osiyo mamlakatlari bo‘yicha mintaqaviy direktori Piter Van Rooý o‘rtasida uchrashuv bo‘lib o‘tdi. Bu haqda Turkmaniston TIV rasmiy saytida xabar berildi.

Uchrashuv avvalida turkman tomoni Piter Van Rooyni yangi lavozimga tayinlangani bilan tabriklab, uning ish tajribasi Turkmaniston va Xalqaro mehnat tashkiloti o‘rtasidagi hamkorlikni yanada mustahkamlashga xizmat qilishiga ishonch bildirdi.

Tomonlar Turkmanistonning Birlashgan Millatlar Tashkiloti tizimi bilan hamkorligi doirasida Xalqaro mehnat tashkiloti bilan aloqalar izchil rivojlanib borayotganini qayd etib, hamkorlik tizimli xarakterga egaligini hamda qo‘shma yo‘l xaritalari va loyihalar orqali amalga oshirilayotganini ta’kidladilar.

Suhbat davomida Turkmanistonda BMT ixtisoslashgan muassasalarining institutsional ishtirokini kengaytirish masalalari, shuningdek, munosib mehnat tamoyillarini ilgari surish va ijtimoiy muloqotni rivojlantirishga qaratilgan qo‘shma loyihalarni amalga oshirish masalalari muhokama qilindi.

Turkmaniston va Xalqaro mehnat tashkiloti o‘rtasida 2026-yil uchun hamkorlik bo‘yicha “Yo‘l xaritasi”ni amalga oshirishning ahamiyati alohida qayd etildi.

Turkmanistonning Xalqaro mehnat tashkiloti faoliyatidagi ishtiroki doirasida mamlakat tashkilot konvensiyalari bo‘yicha muntazam ravishda hisobotlar taqdim etib borayotgani hamda shu yilning iyun oyida Jenevada bo‘lib o‘tadigan Xalqaro mehnat konferensiyasining navbatdagi majlisida ishtirok etishi bildirildi.

Uchrashuv yakunlari bo‘yicha tomonlar Turkmanistonning Xalqaro mehnat tashkiloti bilan hamkorligini yanada mustahkamlashdan o‘zaro manfaatdor ekanliklarini tasdiqladilar.