Turkmanistonda 2026-yilda koʻplab ijtimoiy-maishiy, sogʻliqni saqlash va iqtisodiy obʼyektlar foydalanishga topshiriladi

Avval xabar berganimizdek, 13-fevral kuni Turkmaniston Prezidenti Serdar Berdimuhamedov Turkmaniston Vazirlar Mahkamasining kengaytirilgan majlisini oʻtkazdi. Majlisda mamlakat iqtisodiyoti tarmoqlarida 2025-yilda amalga oshirilgan ishlarning yakunlari saralandi hamda 2026-yilda oldinda turgan vazifalar bilan bogʻliq masalalar koʻrib chiqildi.

Majlis davomida «Turkmanistonni 2026-yilda ijtimoiy-iqtisodiy rivojlantirish va investitsiya dasturi»ga muvofiq, joriy yilda umumiy maydoni 900 ming kvadrat metrdan ortiq boʻlgan turar-joy binolarini, 3 ming 380 oʻrinli umumtaʼlim muassasalarini, 1 ming 80 oʻrinli maktabgacha taʼlim muassasalarini qurib foydalanishga topshirish rejalashtirilayotgani aytildi.

Shu munosabat bilan, davlat rahbari joriy yilda Ashxobod shahrining «Parahat — 7» turar-joy majmuasida 30 ta turar-joy binosi hamda koʻplab savdo va xizmat koʻrsatish uylarini, Buzmeyin tumanidagi turar-joy majmuasida 46 ta zamonaviy uy-joyni, Ashxobodda 127 ta ikki qavatli kottej tipidagi uy-joylarni, 4 ming oʻrinli koʻp tarmoqli madaniyat markazini qurib bitkazish topshirilishini, shuningdek, Ashxobodda Xalqaro pediatriya, Xalqaro onkologiya ilmiy-klinik markazlari va Stomatologiya markazi foydalanishga topshirilishini, «Archman» sihatgohida esa 400 oʻrinli yangi binolar majmuasi fuqarolarga xizmat koʻrsata boshlashini taʼkidladi.

Bundan tashqari, joriy yilda Ashxobod — Turkmanobod yuqori tezlikdagi avtomobil yoʻlining Mari — Turkmanobod qismi, Bolqon viloyatining Qizilarbat tumanida yangi zamonaviy qishloq, Qizilarbat tumanida koʻp tarmoqli elektr stansiyasi, Turkmanboshi tumanining Guvlimayoq qoʻrgʻonida turar-joylar va binolar majmuasi foydalanishga topshiriladi. Turkman davlat arxitektura-qurilish instituti hamda Seyitnazar Seydi nomidagi Turkman davlat pedagogika institutining yangi binolari majmualari ham tantanali ravishda ochiladi. Aholi yashash sharoitlarini yaxshilash maqsadida avtomobil yoʻllari, aloqa, suv, gaz, elektr taʼminoti tizimlari, suv va oqova suvlarni tozalash inshootlari qurilishiga salmoqli mablagʻlar yoʻnaltiriladi.