Turkmanistonda harbiy qismlarning yangi bino va inshootlar majmuasi ochildi

Turkmaniston Prezidenti, mamlakat Qurolli Kuchlarining Oliy Bosh Qo‘mondoni, armiya generali Serdar Berdimuhamedov mamlakatning sharqiy qismida, Lebap viloyatining Sayot tumanida joylashgan Qurolli Kuchlar harbiy qismlarining yangi bino va inshootlar majmuasi ochilish marosimida ishtirok etdi.

Davlat rahbari askarlarning yotoqxona binolarini ko‘zdan kechirib, ularning yashash sharoitlari bilan tanishdi. Dam olish xonalari, Gurbanguli Berdimuhamedov asarlari joylashtirilgan kutubxona va zamonaviy sport zalini ko‘rdi.

Shundan so‘ng Prezident Serdar Berdimuhamedovga harbiy qismlar tarkibiga kelib tushgan eng so‘nggi rusumdagi harbiy texnikalar namoyish etildi. Davlat rahbari armiyani modernizatsiya qilish betaraf Turkmanistonning “po‘lat qalqoni” ekanini alohida ta’kidladi.

Prezident yangi oshxonaga tashrif buyurib, taomlar sifati bilan qiziqdi. Askar-oshpazlar taomlar faqat tabiiy mahsulotlardan va milliy oshxonaning an’anaviy retseptlari asosida tayyorlanishini ma’lum qildilar. Majmua hududida zamonaviy uskunalar bilan jihozlangan tibbiyot bo‘limi, savdo markazi va sport maydonchalari ham mavjud.

Maishiy sharoitlar ko‘zdan kechirilgach, jangovar tayyorgarlik mashg‘ulotlari bo‘lib o‘tdi. Prezident mashg‘ulot suv havzasidagi kuzatuv nuqtasidan harbiy xizmatchilarning ko‘rgazmali chiqishlarini tomosha qildi. Maxsus texnika yordamida ular bir necha daqiqa ichida qo‘shinlar o‘tishi uchun suv to‘sig‘i ustidan ko‘prik qurishdi.

Safarning yakuniy bosqichi yangi uylarning topshirilishi bo‘ldi. Prezident Serdar Berdimuhamedov ofitserlar oilalari uchun mo‘ljallangan turar joy majmuasini ko‘zdan kechirdi. Bu yerda har biri 50 xonadondan iborat, jami 200 oilaga mo‘ljallangan to‘rtta zamonaviy to‘rt qavatli uy, shuningdek do‘kon, bolalar maydonchasi va avtoturargoh qurilgan. Davlat rahbari oilalardan biriga mehmon bo‘lib, harbiy xizmatchining farzandlari bilan suhbatlashdi va ularga sovg‘alar topshirdi.

Safar yakunida Prezident Serdar Berdimuhamedov yangi xizmat avtomobillarining kalitlarini topshirdi.