Turkmanistonda yuqori tezlikdagi avtomobil yoʻlining Mari — Turkmanobod qismi ochiladi

Turkmaniston Prezidenti Serdar Berdimuhamedov juma kuni boʻlib oʻtgan Vazirlar Mahkamasining kengaytirilgan yigʻilishida 2026-yilda Ashxobod — Turkmanobod yuqori tezlikdagi avtomobil yoʻlining Mari — Turkmanobod qismi foydalanishga topshirilishini maʼlum qildi.

Turkmaniston rasmiy ommaviy axborot vositalari xabariga koʻra, davlat rahbari joriy yilda Bolqon viloyatining Qizilarbat tumanida yangi zamonaviy qishloq, Qizilarbat tumanida koʻp tarmoqli elektr stansiyasi, Turkmanboshi tumanining Guvlymayak qoʻrgʻonida turar joy binolari va inshootlari majmuasi foydalanishga topshirilishini aytdi.

Bundan tashqari, Turkmaniston davlat meʼmorchilik va qurilish instituti hamda Seyitnazar Seydi nomidagi Turkmaniston davlat pedagogika institutining yangi bino majmualari tantanali ravishda ochiladi.

Xabarda taʼkidlanganidek, 2026-yilda aholining turmush sharoitini yaxshilash maqsadida avtomobil yoʻllari, aloqa, suv, gaz, elektr taʼminoti tizimlari, suv va kanalizatsiya tozalash inshootlari qurilishiga katta mablagʻlar yoʻnaltiriladi.

Davlat rahbari mamlakatda “Mustaqil, doimiy Neytral Turkmaniston — tulporlar qanotida amalga oshgan orzular yurti” yili munosabati bilan bir qator xalqaro tadbirlar oʻtkazilishini aytdi va rejalashtirilgan tadbirlarni yuqori saviyada oʻtkazish boʻyicha davlat tashkiliy qoʻmitasini tuzish toʻgʻrisidagi qarorni imzolaganini taʼkidladi.

Vazirlar Mahkamasining kengaytirilgan yigʻilishida 2025-yilda mamlakatda amalga oshirilgan ishlar yakunlari sarhisob qilindi va Vazirlar Mahkamasi Raisi oʻrinbosarlari, ayrim vazirliklar rahbarlari va viloyat hokimlarining hisobotlari tinglandi. Shuningdek, yigʻilishda 2026-yilda mamlakatni ijtimoiy-iqtisodiy rivojlantirish boʻyicha oldinda turgan vazifalar muhokama qilindi.