Turkmanistonning BMTning Jenevadagi bo‘limi huzuridagi Doimiy vakilining Parlamentlararo Ittifoq Bosh kotibi bilan uchrashuvi

2026-yil 25-fevral kuni Turkmanistonning BMTning Jenevadagi bo‘limi huzuridagi Doimiy vakili V.Hajiyevning Parlamentlararo Ittifoq (PI) Bosh kotibi Martin Chungong bilan uchrashuvi bo‘lib o‘tdi. Bu haqda Turkmaniston TIV saytida xabar berilgan.

Uchrashuv davomida turkman tomoni Turkmanistonning Parlamentlar ayol rahbarlarining 16-sammitiga mezbonlik qilishga tayyorligini tasdiqladi va Turkmaniston Mejlisi Raisining Ittifoq rahbariyatiga yo‘llagan maktublarini rasman topshirdi. Ushbu forumni o‘tkazish Turkmaniston Prezidentining BMT Bosh Assambleyasining 80-sessiyasi doirasida ilgari surgan 2028-yilni – Xalqaro huquq yili deb e’lon qilish haqidagi tashabbusini amalga oshirishning muhim bosqichlaridan biri sifatida ko‘rilmoqda.

Parlamentlararo Ittifoq Bosh kotibi ushbu tashabbusni minnatdorchilik bilan qabul qildi va Turkmanistonning navbatdagi Sammitni o‘tkazish borasidagi niyatini to‘liq qo‘llab-quvvatlashini bildirdi. 2028-yilni – Xalqaro huquq yili deb e’lon qilish haqidagi tashabbus juda o‘z vaqtida ekanligi hamda huquq ustuvorligi, institutsional barqarorlik va inklyuziv rivojlanishni mustahkamlash bo‘yicha hozirgi zamon dunyo hamjamiyatining muhim ehtiyojlariga to‘la javob berishi ta’kidlandi.

Tomonlar mintaqada parlamentlararo muloqotni rivojlantirishda Markaziy Osiyo davlatlarining ortib borayotgan o‘rniga alohida e’tibor qaratdilar. Turkmanistonning xalqaro maydondagi faolligi parlament diplomatiyasi vositalari orqali tinchlikni mustahkamlashga va samarali hamkorlik kun tartibini ilgari surishga xizmat qilayotgani qayd etildi.

Uchrashuv yakunida tomonlar hamkorlikni yanada chuqurlashtirishga o‘zaro qiziqishlarini tasdiqladilar va bo‘lajak Sammitga tayyorgarlik ko‘rish doirasida yaqin aloqalarni davom ettirishga kelishib oldilar.