Turkmanistonning “EKSPO — 2030” Butunjahon ko‘rgazmasida ishtirok etishi muhokama qilindi

Turkmanistonning Saudiya Arabistoni Podshohligidagi Favqulodda va muxtor elchisi Muhammetgeldi Ayazov “EXPO 2030 Riyadh” kompaniyasining manfaatdor mamlakatlar bo‘yicha boshqarmasi rahbari Mohammed bin Garadi bilan uchrashdi. Uchrashuvda Turkmanistonning “EKSPO — 2030” Butunjahon ko‘rgazmasida ishtirok etishi bilan bog‘liq masalalar ko‘rib chiqildi.

Turkmaniston rasmiy ommaviy axborot vositalarining juma kuni xabar berishicha, “EKSPO — 2030” Butunjahon ko‘rgazmasi 2030-yilning oktyabridan 2031-yilning martigacha Er-Riyod shahrida bo‘lib o‘tadi.

Tomonlar Turkmanistonning ushbu yirik tadbirda ishtirok etishi mamlakatning xalqaro obro‘sini yanada oshirishga, turli sohalarda erishilgan yutuqlarni dunyoga keng targ‘ib qilishga hamda xorijiy davlatlar bilan savdo-iqtisodiy aloqalarni rivojlantirishga xizmat qilishiga ishonch bildirdilar.

Bundan tashqari, Turkmaniston Yaponiyaning Yokohama shahrida 2027-yil 19-martdan 26-sentyabrgacha bo‘lib o‘tadigan “GREENxEXPO 2027” xalqaro ko‘rgazmasida ishtirok etishini tasdiqladi.