Turkmanistonning sayyohlik diplomatiyasi: «Turkmentravel — 2026» xalqaro forumi
Hurmatli xalqaro sayyohlik ko‘rgazmasi va konferensiyasi ishtirokchilari! Qadrli mehmonlar!
Sizni Ashxobod shahrida o‘tkazilayotgan «Turkmentravel — 2026» nomli xalqaro sayyohlik ko‘rgazmasi va konferensiyasining tantanali ochilishi munosabati bilan chin qalbimdan tabriklayman. «Mustaqil, doimiy Betaraf Turkmaniston — ravnaq va maqsadlar maskani» yilida tashkil etilayotgan ushbu xalqaro forum sayyohlik sohasida muhim ahamiyatga ega voqeaga aylanishiga qat’iy ishonaman.
Turkman xalqining Milliy Lideri Qahramon Arkadagimiz tomonidan asos solinib, hozirgi davrda muvaffaqiyatli amalga oshirilayotgan buyuk islohotlar mamlakatimizni barcha yo‘nalishlar bo‘yicha uyg‘un rivojlantirishga, xalqimizning turmush sharoitini yanada yaxshilashga xizmat qilmoqda. Dunyo davlatlari va nufuzli xalqaro tashkilotlar bilan yo‘lga qo‘yilgan xayrli hamkorlik izchil ravishda ilgari surilmoqda. Berqaror davlatning yangi davri Uyg‘onish davrida mamlakatimiz sayyohlik sohasida olib borilayotgan keng ko‘lamli ishlar ham tobora ravnaq topmoqda. Betaraf Turkmaniston bu yo‘nalishda xalqaro hamkorlikni rivojlantirishga muhim ahamiyat bermoqda. BMTning Butunjahon sayyohlik tashkiloti, Iqtisodiy hamkorlik tashkiloti, Sayyohlik shaharlarining butunjahon federatsiyasi, xorijiy sayyohlik korxonalari bilan olib borilayotgan hamkorlik soha rivojida yangi imkoniyatlarni ochmoqda.
Ushbu sayyohlik ko‘rgazmasi va konferensiyasining o‘tkazilishi bu boradagi xalqaro hamkorlik poydevori yanada mustahkamlanayotganining yorqin nishonasidir. Ko‘rgazmada mamlakatimiz va dunyo davlatlari sayyohlik korxonalarining ishtirok etishi o‘zaro tajriba almashishga, bir-birini olib borilayotgan ishlar va yangi loyihalar bilan yaqindan tanishtirishga katta yordam beradi. Xalqaro konferensiya davomida o‘tkaziladigan ishchi uchrashuvlar, o‘quv va ilmiy-amaliy maslahatlashuvlar, sayyohlik sayohatlari bu tadbirlarning ahamiyatini yanada oshiradi.
Hozirgi davrda mamlakatimizda xalqaro sayyohlikning boy tajribasi joriy etilgan, huquqiy, iqtisodiy, ijtimoiy asoslari zamonaviylashtirilgan milliy sayyohlik sohasi shakllandi. Bu yo‘nalishda xalqaro konferensiyalarning muntazam o‘tkazilishi sohani zamonaviylashtirishda, turdosh tuzilmalar bilan aloqalarni rivojlantirishda juda muhimdir.
Qadrli xalqaro ko‘rgazma va konferensiya ishtirokchilari! Hurmatli do‘stlar!
Turkman xalqining ko‘p asrlar davomida yaratgan milliy qadriyatlari, tarixiy obidalari, boy madaniy merosi, urf-odatlari umuminsoniy qadriyatlar xazinasidan munosib o‘rin oldi. Shonli ota-bobolarimizdan meros qolgan milliy san’atimizning nodir namunalari, qadimiy qadriyatlarimizning bir qancha turlari YUNESKOning Butunjahon merosi va Nomoddiy madaniy merosi ro‘yxatlariga kiritildi. Mamlakatimizning «Qadimiy Marv», «Niso», «Ko‘hna Urganch» kabi davlat tarixiy-madaniy qo‘riqxonalari obidalari, shuningdek, «Buyuk Ipak yo‘li: Zarafshon — Qoraqum yo‘lagi» xalqaro loyihasi doirasidagi Amul — Marv tarmog‘i, «Bereketli Garagum», «Gaplang‘ir» davlat tabiiy qo‘riqxonalari, «Repetek» davlat biosfera qo‘riqxonasi va uning «Yeraji» buyurtmaxonasi cho‘l ekotizimlari YUNESKOning Butunjahon merosi ro‘yxatidan o‘rin oldi. Bu joylar o‘zining juda qadimiy asrlarga tegishli obidalari va hayratlanarli tabiati bilan dunyo sayyohligida keng mashhurdir.
Sayyohlik shaharlarining butunjahon federatsiyasi ro‘yxatiga kiritilgan Ashxobod, ajoyib binolari bilan hayratga soluvchi Arkadag shaharlari, «Avaza» milliy sayyohlik zonasi, Qoraqum sahrosi hamda Ko‘ytendog‘ning tabiiy mo‘jizalari mamlakatimiz sayyohlik imkoniyatlarining istiqboli ulkanligidan to‘la dalolat beradi. Bunday xalqaro ko‘rgazma va konferensiyalarning o‘tkazilishi Mustaqil yurtimizning tarixiy-madaniy, tabiiy obidalarini, go‘zal go‘shalarini targ‘ib qilishda hamda ularga xorijiy sayyohlarni jalb etishda muhim ahamiyatga egadir.
Hurmatli insonlar! Qadrli mehmonlar!
«Turkmentravel — 2026» nomli xalqaro sayyohlik ko‘rgazmasi va konferensiyasining «Mustaqil, doimiy Betaraf Turkmaniston — ravnaq va maqsadlar maskani» yilida o‘tkazilishi ajoyib uyg‘unlikni yaratadi. Berqaror davlatimiz hozirgi davrda shiddatli rivojlanishning oq yo‘li bilan ishonchli odimlamoqda. Mamlakatimiz sayyohlik sohasida erishilayotgan ulkan yutuqlar esa Betaraf davlatimizning xalqaro obro‘sini, dunyodagi shon-shuhratini yanada yuksaltirmoqda.
Sizni «Turkmentravel — 2026» xalqaro sayyohlik ko‘rgazmasi va konferensiyasi o‘z ishini boshlagani bilan yana bir bor chin qalbimdan tabriklayman. Sizga mustahkam sog‘liq, sayyohlik sohasini rivojlantirish yo‘lidagi tinimsiz faoliyatingizda ulkan muvaffaqiyatlar tilayman.
Turkmaniston Prezidenti Serdar BERDIMUHAMEDOV.
