“Turkmenpoçta” Amazon, eBay, Wildberries kabi internet-savdo maydonchalaridan tovarlar yetkazib berishni yo‘lga qo‘ymoqchi

“Turkmenpoçta” pochta aloqa kompaniyasi xalqaro hamkorlik doirasida yirik xalqaro internet-platformalardan tovarlarni Turkmanistonga yetkazib berish bo‘yicha yangi xizmatlarni joriy etish ustida ishlamoqda. Raqamli tizimlarning qo‘llanilishi jo‘natmalarni kuzatib borish va logistikani avtomatlashtirish imkonini beradi.

“Turkmenpoçta” pochta aloqa kompaniyasi xalqaro hamkorlik doirasida “Omniva”, “Amazon”, “eBay”, “AliExpress”, “Rakuten”, “Wildberries”, “Adex”, “Internet resheniya” kabi yirik xorijiy internet-savdo maydonchalari va internet-do‘konlaridan sotib olingan tovarlarni Turkmanistonga yetkazib berishni tashkil etish bo‘yicha tegishli ishlarni amalga oshirmoqda. Bu haqda o‘tgan haftaning chorshanba kuni “Turkmentelekom” elektr aloqa kompaniyasi xabar berdi.

Xabarda ta’kidlanishicha, elektron ma’lumotlar almashish, xalqaro pochta jo‘natmalarini kuzatib borish va pochta aloqasi xizmatlarini raqamlashtirish maqsadida, “Turkmenpoçta” kompaniyasi Butunjahon pochta ittifoqining “IPS” (International Postal System – xalqaro pochta tizimi) va “CDS” (Customs Declaration System – bojxona deklaratsiyalash tizimi) raqamli tizimlariga ulandi.

Bu esa, o‘z navbatida, xalqaro pochta jo‘natmalarini ishonchli va samarali yuborish, ularni kuzatib borish, logistika operatsiyalarini avtomatlashtirish, mijozlarga xizmat ko‘rsatish sifatini oshirish hamda katta hajmdagi ma’lumotlarni tez va xavfsiz almashish imkonini berdi, deyiladi xabarda.

Hozirgi vaqtda “Turkmenpoçta” pochta aloqa kompaniyasi xorijiy kompaniyalar bilan aloqalarni o‘rnatish, logistikani faollashtirish, elektron savdo maydonchalari va pochta jo‘natmalarini yetkazib berish bo‘yicha zamonaviy yechimlarni joriy etishni davom ettirmoqda.

“Turkmenpoçta” pochta aloqa kompaniyasi 1993-yildan beri Butunjahon pochta ittifoqi (UPU) a’zosi bo‘lib, bugungi kungacha 192 ta xorijiy pochta operatorlari bilan ko‘p tomonlama aloqalarni olib bormoqda.