Vashingtondagi muhim uchrashuv: Turkmaniston va AQSh hamkorlikning yangi yo‘nalishlarini belgilab oldilar

Amerika Qo‘shma Shtatlarining poytaxti Vashington shahrida Turkmaniston va AQSh tashqi siyosat idoralari rahbarlari ishtirokida yuqori darajadagi uchrashuv bo‘lib o‘tdi. Bu haqda Turkmaniston TIV saytida xabar berilgan. Oq uyda tashkil etilgan ushbu muzokaralar davomida Turkmaniston Tashqi ishlar vaziri Rashid Meredov hamda AQSh Davlat kotibi Marko Rubio ikki tomonlama munosabatlarning strategik yo‘nalishlarini muhokama qildilar.

Uchrashuvda tomonlar so‘nggi paytlarda turkman-amerika siyosiy-diplomatik muloqoti yangi bosqichga ko‘tarilganini va tobora faollashib borayotganini alohida mamnuniyat bilan qayd etdilar. Shuningdek, izchil rivojlanishni ta’minlashda yuqori va oliy darajadagi muntazam uchrashuvlar hamda maslahatlashuvlar muhim o‘rin tutishi ta’kidlandi.

Muzokaralarning asosiy mazmuni iqtisodiy hamkorlikka qaratildi. Tomonlar savdo-iqtisodiy, energetika va transport-kommunikatsiya sohalaridagi munosabatlarni kengaytirishga alohida e’tibor qaratdilar. Bunda energetika xavfsizligini ta’minlash va mintaqada energiya resurslarini yetkazib berish yo‘nalishlarini diversifikatsiya qilish (turli yo‘nalishlarga qaratish) masalalari o‘zaro manfaatli hamkorlikning ustuvor yo‘nalishlaridan biri sifatida belgilandi.

Uchrashuv davomida mintaqaviy xavfsizlik, zamonaviy xavf-xatarlar va tahdidlarga qarshi kurashish, shuningdek, ko‘p tomonlama formatlarda, shu jumladan “C5+1” platformasi doirasidagi hamkorlik masalalari ham ko‘rib chiqildi.

Muzokaralar yakunida tomonlar ikki tomonlama munosabatlarning kelajagi juda katta ekanligini tasdiqlab, o‘zaro qiziqish bildirilayotgan barcha yo‘nalishlar bo‘yicha samarali va konstruktiv muloqotni muntazam davom ettirishga tayyor ekanliklarini ma’lum qildilar.