Xivada Suv xo‘jaligi masalalari bo‘yicha qo‘shma turkman–o‘zbek hukumatlararo komissiya yig‘ilishi bo‘lib o‘tdi

30-yanvar kuni Xiva shahrida Suv xo‘jaligi masalalari bo‘yicha qo‘shma turkman–o‘zbek hukumatlararo komissiyasining beshinchi yig‘ilishi bo‘lib o‘tdi. Yig‘ilishda turkman tomoniga Turkmaniston Vazirlar Mahkamasi Raisining o‘rinbosari T. Atahallyyev, o‘zbek tomoniga esa O‘zbekiston Respublikasi Prezidentining qishloq xo‘jaligini rivojlantirish masalalari bo‘yicha maslahatchisi Sh. Gʻaniyev rahbarlik qildi. Bu haqda tashqi siyosat idorasi xabar berdi.

Yig‘ilish ishida ikki davlatning suv resurslarini boshqarish, irrigatsiya va atrof-muhitni muhofaza qilish uchun mas’ul bo‘lgan vazirlik va idoralari rahbarlari hamda vakillari ishtirok etdilar.

Komissiya hamraislarining chiqishlarida yaxshi qo‘shnichilik, o‘zaro ishonch, teng huquqlilik va tomonlarning milliy manfaatlarini inobatga olish tamoyillariga asoslangan turkman–o‘zbek munosabatlarining yuqori darajasi qayd etildi. Tomonlar suv xo‘jaligi sohasigina emas, balki iqtisodiy, infratuzilmaviy va gumanitar yo‘nalishlarda ham samarali hamkorlikni kengaytirish va chuqurlashtirishga bo‘lgan umumiy intilishni ta’kidladilar.

Shuningdek, tomonlar Turkmaniston va O‘zbekiston Respublikasi o‘rtasida suv resurslarini boshqarish sohasidagi barqaror va o‘zaro manfaatli hamkorlik oziq-ovqat xavfsizligini ta’minlash, qishloq xo‘jaligining barqaror rivojlanishini ta’minlash hamda mintaqada ijtimoiy-iqtisodiy barqarorlikni mustahkamlashda strategik ahamiyatga ega ekanini alohida qayd etdilar.

Yig‘ilish davomida suv resurslaridan oqilona foydalanish bo‘yicha zamonaviy texnologiyalarni joriy etish, suv monitoringi va hisobini yuritish mexanizmlarini takomillashtirish, shuningdek, suv xo‘jaligi sohasidagi mutaxassislar salohiyatini yanada oshirish masalalari muhokama qilindi. Iqlim o‘zgarishiga moslashish va uning barqaror suv ta’minotiga keltiradigan xavflarini kamaytirish masalalariga alohida e’tibor qaratildi.

Tomonlar ikki tomonlama maslahatlashuvlar, hukumatlararo komissiya yig‘ilishlari va qo‘shma tadbirlarni muntazam o‘tkazishga, shuningdek, hamkorlikning huquqiy va institutsional asoslarini yanada mustahkamlashga sodiqliklarini tasdiqladilar.

Yig‘ilish ishchan va konstruktiv ruhda o‘tib, turkman–o‘zbek strategik muloqotining izchil va tizimli xarakterga ega ekanini yaqqol namoyon etdi. Yig‘ilish yakunida tomonlar Suv xo‘jaligi masalalari bo‘yicha qo‘shma turkman–o‘zbek hukumatlararo komissiyasining beshinchi yig‘ilishi Bayonnomasini imzoladilar.