“Yandex Ob-havo” nima kiyish kerakligi haqida maslahat beruvchi sun’iy intellektli chatni ishga tushirdi

“Yandex Ob-havo” xizmatida yangi imkoniyat — foydalanuvchilarga ob-havo sharoitlarini hisobga olgan holda kunlarini rejalashtirishga yordam beradigan sun’iy intellektli (AI) chat paydo bo‘ldi. “Alice AI” texnologiyasiga asoslangan neyrotarmoq shaxsiy maslahatlar beradi: masalan, sayr uchun qanday kiyinish kerakligi, velosiped mavsumini qachon boshlash lozimligi yoki avtomobil shinalarini almashtirish vaqti kelgan-kelmaganligi haqida ko‘rsatma beradi.

Chat qaysi ma’lumot manbasidan foydalanishni — uzoq muddatli prognozni, iqlim statistikasini yoki yaqin kun uchun mo‘ljallangan prognozni mustaqil ravishda belgilaydi. U foydalanuvchining geolokatsiyasini hisobga oladi va nafaqat butun shahar uchun, balki aniq bir tuman uchun ham javob beradi.

Ishlab chiquvchilarning ta’kidlashicha, chat faoliyati asosida namlik va shamol tezligini ham o‘z ichiga olgan 100 dan ortiq ob-havo ko‘rsatkichlariga bo‘lgan ochiqlik yotadi. Neyrotarmoq model kontekst protokoli (MCP) orqali “Yandex Ob-havo” tizimiga ulangan bo‘lib, bu unga ob-havodagi o‘zgarishlar haqidagi ma’lumotlarni tezkorlik bilan olish imkonini beradi.