«Dana bilim merkezi» Lebap welaýatynda matematika boýunça üçünji bäsleşigini geçirdi
Türkmenistanyň Tebigy we takyk ugurlardaky dersleri okatmagy kämilleşdirmegiň Konsepsiýasyna laýyklykda, ýaş nesliň bilim derejesini ýokarlandyrmak maksady bilen, “Dana bilim merkezi” hojalyk jemgyýetiniň Türkmenabat şahamçasy tarapyndan matematika boýunça III «Dana» bäsleşigi geçirildi. Bäsleşik Türkmenistanyň Magtymguly adyndaky Ýaşlar guramasynyň Türkmenabat şäher geňeşi hem-de Lebap welaýat Baş bilim müdirligi bilen hyzmatdaşlykda guraldy.
Bäsleşige welaýatyň dürli künjeklerinden 150-den gowrak zehinli 7-8-nji synp okuwçysy gatnaşyp, matematiki ukyplaryny, logiki pikirleniş mümkinçiliklerini hem-de çylşyrymly meseleleri çözmekde başarnyklaryny görkezdiler.
Netijelere görä, birinji orny Türkmenabat şäherindäki ýöriteleşdirilen 29-njy orta mekdebiň 7-nji synp okuwçysy Arslan Abdyrasulow eýeledi. Ol 71 utuk toplap, diňe öz synpdaşlaryny däl, eýsem 8-nji synp okuwçylaryny hem yzda galdyrmagy başardy.
Ikinji orunlara ýöriteleşdirilen 41-nji mekdebiň okuwçysy Maksat Allaberenow (67 utuk) we ýöriteleşdirilen 28-nji mekdebiň okuwçysy Nazar Döwletow (61 utuk) mynasyp boldular.
Üçünji orny eýelän okuwçylardan Türkmenabat şäheriniň ýöriteleşdirilen 28-nji orta mekdebiniň okuwçylary Kerwen Nagymow 60, Gülbahar Derýaýewa 59, Türkmenabat şäheriniň 31-nji orta mekdebiniň okuwçysy Esra Rozykulyýewa bolsa 58 utuk toplady. Bäsleşikde Türkmenabat şäheriniň ýöriteleşdirilen 41-nji orta mekdebiniň okuwçysy Söhbet Atamuradow bilen Türkmenabat şäheriniň 11-nji orta mekdebiniň okuwçysy Ismail Durdyýew höweslendiriji baýraga mynasyp boldular.
Bäsleşikde üstünlik gazanan okuwçylara “Dana bilim merkezi” tarapyndan ýadygärlik sowgatlary we ýeňillikli okamak hukugy, welaýat Baş bilim müdirligi tarapyndan bolsa Hormat hatlary gowşuryldy. Şeýle hem höweslendiriji baýraklara mynasyp bolan okuwçylar hem boldy: 41-nji mekdepden Söhbet Atamuradow we 11-nji mekdepden Ismail Durdyýew.
Ýeri gelende aýtsak, “Dana bilim merkezi” hojalyk jemgyýetiniň Türkmenabat şahamçasy häzirki wagtda Gündogar sebitiň iň öňdebaryjy bilim merkezleriniň biri bolup, şäheriň iki ýerinde okuwlaryny alyp barýar. Diňleýjiler diňe bir şäherden däl, eýsem goňşy etraplardan hem bu merkeze gatnaşýarlar.
