Ýagşygeldi Kakaýew adyndaky Halkara nebit we gaz uniwersiteti nebitgaz pudagynyň dürli ugurlary, inženerçilik, IT tehnologiýalary, ykdysadyýet we logistika boýunça hünärmenleri taýýarlamak üçin 2026/2027-nji okuw ýylyna talyplyga kabul ediş möwsüminiň başlanandygyny yglan edýär.

Okuw ugurlary

Uniwersitetde hünärmen we bakalawr maksatnamalary boýunça okuwlar tölegli esasda alnyp barylýar:

  • Nebitgaz we inženerçilik: Geologiýa, burawlama, känleri özleşdirmek, nebitgazgeçirijileri, himiýa tehnologiýasy, maşyngurluşyk, elektroenergetika we awtomatika.
  • IT we ykdysadyýet: Maglumat ulgamlary, maglumat howpsuzlygy, ykdysadyýet we dolandyryş, işgärleri dolandyrmak.
  • Iňlis dilinde okadylýan ugurlar: Nebitgaz işi, geologiýa, programma inženerligi, himiýa tehnologiýasy we logistika. (Bu ugurlar boýunça iňlis dilini erkin bilmeýänler üçin 1 ýyllyk dil taýýarlygy göz öňünde tutulandyr).

Resminamalary kabul etmek

Resmi iş kagyzlary 2026-njy ýylyň 13 — 26-njy iýuly aralygynda welaýat merkezlerinde we Aşgabat şäherinde kabul edilýär. Dalaşgärler rektoryň adyna arza, sowalnama, bilimi baradaky resminamanyň asyl nusgasy, saglyk kepilnamasy, häsiýetnama, fotosuratlar, zähmet depderçesiniň göçürmesi (işleýänler üçin), pasportyň we harby şahadatnamanyň nusgalaryny tabşyrmalydyrlar.

Giriş synaglarynyň tertibi

Giriş synaglary Aşgabat şäherinde geçirilýär. Dalaşgärler welaýatlar boýunça bellenilen möhletlerde synaglara gatnaşmalydyrlar:

  • Aşgabat we Arkadag şäherleri: 29-njy iýul — 1-nji awgust;
  • Ahal welaýaty: 2-4-nji awgust;
  • Lebap we Daşoguz welaýatlary: 5-7-nji awgust;
  • Mary welaýaty: 8-10-njy awgust;
  • Balkan welaýaty: 11-13-nji awgust.

Synaglar fizika, matematika, himiýa ýa-da iňlis dili derslerinden (saýlanan ugry boýunça) Türkmenistanyň taryhy bilen birlikde döwlet dilinde dilden geçirilýär.

Habarlaşmak üçin: Salgy: Aşgabat şäheri, Arçabil şaýoly, 8. Telefon belgileri: 39-13-74, 39-13-70.