Berdimuhamedow Aliýewa akhalteke at sowgat berdi, Mirziýewa düýe we köşek gowşurdy

Sowgatlaryň dabaraly gowşurylyşy 22-nji awgustda Türkmenistanyň, Azerbaýjanyň we Özbegistanyň arasynda geçiren ýokary derejeli üçtaraplaýyn sammitiň çäginde, Hazar deňziniň kenarynda ýerleşýän “Awaza” syýahatçylyk zolagynda boldy.

TDH-nyň habarynda bellenmegine görä, sowgat gowşurylyşy “Türkmenistanyň, Azerbaýjanyň we Özbegistanyň ýokary derejeli duşuşygyna gatnaşan ýolbaşçylara çuňňur hoşallyk bildirmek, duşuşykda kabul edilen oňyn kararlar we gol çekilen ylalaşyklary goldamak maksady bilen” geçirildi. Bu sowgatlar üç ýurduň ýolbaşçylary arasyndaky dostluk we özara hormatyň nyşany boldy.

Sammit konstruktiw gepleşikleriň we özara düşünjäniň atmosferasynda boldy. Duşuşygyň dowamynda prezidentler ykdysadyýet, ulag, energetika, ynsanperwer gatnaşyklary we beýleki ugurlarda üçtaraplaýyn hyzmatdaşlygy ösdürmegiň wajyp meselelerini ara alyp maslahatlaşdylar.

Şeýle-de, sammitiň jemlerinde hyzmatdaşlygyň çuňlaşdyrylmagynyň, strategiýa taýdan hyzmatdaşlygyň ösdürilmeginiň we sebitiň durnuklylygynyň üpjün edilmeginiň ähmiýetini nygtayan bilelikdäki beýanat kabul edildi.

Çäräniň dowamynda ulag-logistika we raýat awiasiýasy boýunça hyzmatdaşlygy ösdürmek maksady bilen birnäçe möhüm resminama gol çekildi. Bu resminamalar halkara ulag geçelgelerini ösdürmäge, infrastruktura täzelenmäge we üç ýurduň arasyndaky ulag we söwda gatnaşyklaryny ýeňilleşdirmäge gönükdirilendir. Mundan başga-da, senagat, energetika we medeniýet ulgamyndaky hyzmatdaşlygy giňeltmäge gönükdirilen goşmaça ylalaşyklary hem baglaşdylar.

Bu duşuşyk Türkmenistan, Azerbaýan we Özbegistanyň arasyndaky täze, özara bähbitli hyzmatdaşlygyň formatyny döretmekde, sebitiň durnuklylygyny we parahatçylygyny berkitmekde möhüm ädim boldy.