Birleşen Milletler Guramasynyň Ilatly nokatlar boýunça maksatnamasynyň (UN-Habitat) ýerine ýetiriji direktory Anaklaudiýa Rossbah şäherleri ösdürmekde howanyň üýtgemegini we ilatyň ýaşaýyş jaýyna bolan islegini bilelikde göz öňünde tutmagyň möhümdigini belledi. Onuň pikiriçe, häzirki zaman şäherleri durnukly ösüş ýörelgelerine laýyklykda täzeden meýilleşdirilmeli.

Rossbah bu barada CGTN teleýaýlymyna beren interwýusynda çykyş edip, häzirki wagtda dünýäde parnik gazlarynyň zyňyndylarynyň takmynan 70 göteriminiň şäherlere degişlidigini aýtdy. Şol zyňyndylaryň 40 göterime golaýy bolsa binalar we gurluşyk pudagy bilen baglanyşyklydyr.

BMG-niň wekili şäherleriň diňe bir energiýany iň köp sarp edýän ýerler bolman, eýsem howanyň üýtgemeginiň täsirini ilkinji bolup duýýan sebitlerdigini nygtady. Onuň sözlerine görä, aşa yssy howa ilatyň saglygyna, durmuş derejesine we sosial deňlige gönüden-göni täsir edýär.

Rossbahyň bellemegine görä, şäherleriň içinde temperaturanyň paýlanyşy hem deň däl. Mysal üçin, Braziliýanyň Rio-de-Žaneýro şäherindäki käbir resmi däl ýaşaýyş sebitlerinde howanyň temperaturasy şäheriň beýleki böleklerinden 8 gradus Selsiýe çenli ýokary bolup biler. Bu ýagdaý şäherlerde ekologik meseleler bilen birlikde sosial deňsizligiň hem bardygyny görkezýär.

BMG-niň UN-Habitat maksatnamasynyň ýolbaşçysy şäherleriň çäksiz giňelmeginiň ýerine, has oýlanyşykly we deňagramly gurluşyk ýörelgelerine geçmegiň zerurdygyny aýtdy. Onuň pikiriçe, ýaşaýyş jaýlarynyň gurluşygy ýaşyl zolaklaryň we suw desgalarynyň goralmagy bilen utgaşykly alnyp barylmalydyr.

Şeýle hem ol häzirki wagtda ekologiýa taýdan arassa gurluşyk üçin zerur tehnologiýalaryň bardygyny, emma olaryň giňden ulanylmagy üçin başlangyç çykdajylar bilen elýeterliligiň arasyndaky tapawudy azaltmagyň möhümdigini belledi. Munuň üçin döwlet syýasaty, innowasion maliýe gurallary we hususy pudagyň işjeň gatnaşmagy zerur hasaplanýar.

BMG-niň maglumatlaryna görä, 2050-nji ýyla çenli dünýä ilatynyň 70 göterimine golaýy şäherlerde ýaşar. Häzirki wagtda bolsa 1 milliarddan gowrak adam ýaşaýyş şertleri ýeterlik bolmadyk resmi däl ilatly nokatlarda ýaşaýar.

UN-Habitat şäherleriň durnukly ösüşini köp ýyllardan bäri öňe sürýär. Guramanyň bellemegine görä, howanyň üýtgemegi bilen baglanyşykly häzirki ýagdaý şäherleri has ykjam, ekologik taýdan arassa we ähli ilat gatlaklary üçin amatly görnüşde ösdürmegiň möhümdigini görkezýär.