Türkmenistanyň Döwlet haryt-çig mal biržasynda geçen hepdäniň söwdalarynyň netijeleri boýunça jemi 8 sany geleşik hasaba alyndy. Daşary ýurtly hyzmatdaşlar bilen baglaşylan şertnamalaryň umumy bahasy 7 million 274 müň ABŞ dollaryndan geçdi. Bu barada TDH habar berdi.

Söwda amallaryna Birleşen Arap Emirliklerinden, Türkiýeden we Owganystandan gelen işewür toparlaryň wekilleri gatnaşdy. Daşary ýurtly alyjylara söwdalaryň dowamynda Türkmenistanyň dürli önümleri, şol sanda pagta ýagy, bugdaý uny, ýorgan-düşek üçin toplumlar, nah mata, pagta süýümi we çig ýüpek ýerlenildi.

Biržanyň söwdalarynda içerki bazaryň zerurlyklaryny üpjün etmek boýunça hem geleşikler baglaşyldy. Türkmenistanyň telekeçileri 8 million 212 müň manatdan gowrak möçberdäki nah ýüplügini satyn aldylar.

Biržada geçirilýän söwdalar ýurdumyzyň öndürijileriniň önümlerini içerki we daşary ýurt bazarlaryna çykarmak, şeýle hem milli haryt dolanyşygyny ösdürmek üçin möhüm meýdança bolup durýar. Soňky hepdäniň görkezijileri hem Türkmenistanyň dokma we oba hojalyk önümlerine daşary ýurtly işewürleriň gyzyklanmasynyň dowam edýändigini görkezýär.