Endik döretmeýän güýçli agryny ýeňilleşdiriji derman döredildi

Ýaponiýanyň Kioto uniwersitetinden alymlar täze nesil agyryy ýeňilleşdiriji serişdäni — ADRIANA atly derman serişdesini döretdiler. Bu derman adaty opiodlar ýaly endik döretmeýär we howply ýany täsirleri ýok. Bu barada makala Proceedings of the National Academy of Sciences (PNAS) ylmy žurnalynda neşir edildi.

ADRIANA derman serişdesi könüllilerde we operasiýadan geçen hassalarda üstünlikli kliniki synaglardan geçdi. Morfin we beýleki däp bolan agyry kesijilerden tapawutlylykda, bu derman organizmiň agyry duýgusyny başga usul bilen azaldýar. Ol adrenoreseptorlara täsir edýär — bu reseptorlar adrenalini we noradrenalini kabul edýän nerw ulgamy gurluşlarydyr.

Täze derman α2B-adrenoreseptorlarynyň bir görnüşini petikläp, beýnide signallaryň geçmegine gatnaşýan noradrenaliniň derejesini ýokarlandyrýar. Bu ýagdaý bolsa, agyry duýgusyny peseldýän α2A-adrenoreseptorlarynyň işjeňleşmegine getirýär. Şeýle mehanizm arkaly derman agyryny ýeňilleşdirýär we şol bir wagtyň özünde dem alyş bozulmalary, ýürek işi bilen baglanyşykly problemalar ýa-da endik döretme ýaly ýaramaz täsirleri ýüze çykarmaýar.

Derman ilki bilen haýwanlarda synagdan geçirilenden soň, 1-nji we 2-nji tapgyr kliniki barlaglary üstünlikli tamamlady. Bu barlaglara öýken rak keseliniň sebäpli operasiýa edilen hassalar hem gatnaşdy. Indi ABŞ-da BTB Therapeutics kompaniýasy bilen hyzmatdaşlykda giň gerimli synaglaryň geçirilmegi meýilleşdirilýär.

Döredijileriň pikiriçe, ADRIANA Ýaponiýada döredilen ilkinji opiodsyz agyry kesiji bolup, dünýäde giňden ýaýran “opiod krizisine” garşy göreşde möhüm rol oýnap biler.