Küşt boýunça Ýokary liganyň birinji aýlawynyň öňdebaryjylary kesgitlendi

Aşgabat şäherinde küşt boýunça Türkmenistanyň çempionaty dowam edýär. Ol iki aýlawda geçirilýär. Açyk derejedäki ýaryşa ýurdumyzyň iň güýçli küştçüleri, şol sanda ýedi erkek we bir zenan gatnaşýarlar. Zenanlaryň bäsleşiginde bolsa milli ýaryşlarda saýlanan sekiz oýunçy çykyş edýär.

Birinji aýlawyň tamamlanmagy bilen derejeleriň ikisinde hem tapgyryň öňdebaryjylary kesgitlendi.

Zenanlaryň bäsleşiginde :

Şöhradowa Lala (reýtingi 2109) — 7 utukdan 6,5 utuk toplady. Garaşylyşy ýaly, Lala ýurdumyzda küşt boýunça zenanlar mekdebimiziň öňdebary wekili hökmünde eýeleýän ornuny saklap galýar;

Seýilhanowa Gülmira (reýtingi 1810) — 7 utukdan 4,5 utuk. Gülmira ýaryşa örän batyrgaý başlady, ýöne birinji tapgyryň soňky iki oýny onuň üçin şowsuz boldy. Muňa garamazdan, ol ikinji orunda ýerleşdi;

Rejepowa Jahan (reýtingi 2051) — 7 balldan 4 ball. Häzirki milli çempion heniz öz güýçli taraplaryny görkezmedi. Muňa garamazdan, küşt boýunça bilermenler onuň ikinji tapgyrda çempionlyk ruhuny görkezjekdigine we milli ýygyndyda orun almak ugrundaky göreşde öz ornuny gorajakdygyna ynanýarlar.

Açyk derejedäki bäsleşik:

Hommadow Amanmuhammet (reýtingi 2269) — 7 balldan ählisini toplady. Amanmuhammet tapgyrda örän ýokary derejeli oýun görkezip, uly artykmaçlyk bilen tapawutlandy;

Halynýazow Wepaly (reýtingi 2194) — 7 balldan 4,5 utuk. Häzirki milli çempion ýaryşyň öňdebaryjysyndan asgyn geldi, ýöne onuň geçen ýyl nähili ýeňiş gazanandygy hemmeleriň ýadynda. Şonuň üçin hem, ýaryşyň ahyrynda onuň dartgynly bäsdeşlige girmegine garaşylýar;

Gubataýew Ahmet (reýtingi 2176) — 7 utukdan 4 utuk. Ahmet 5-nji we 6-njy tapgyrlarda Hommadowdan hem-de Halynýazowdan ýeňildi, ýöne soňky tapgyrda Turaýewi ýeňlişe sezewar edip, öz ornuny pugtalandyrdy.

Ýokary liga 11-nji fewrala çenli dowam eder. Öňde milli çempionlary we Türkmenistanyň milli ýygyndy toparlarynyň agzalaryny kesgitleýän ikinji tapgyryň aýgytlaýjy oýunlary bar.

Ýatladyp geçsek, Ýokary liganyň baýrak eýeleriniň üçüsi açyk derejeden milli ýygyndy topara geçer. Ýurdumyzyň Küşt federasiýasy tarapyndan tassyklanan saýlama düzgünlere laýyklykda, Saparmurat Atabaýew (reýtingi 2487) we Meýlis Annaberdiýew (reýtingi 2424) häzirki ýaryşa gatnaşmazdan, ýokary halkara reýtingleri esasynda, erkekler toparymyza girizildi.

Milli zenanlar reýtinginiň öňdebaryjysy Leýla Şöhradowa (reýtingi 2182) reýting esasynda, gönüden-göni zenanlar ýygyndy toparymyza kabul edildi. Olimpiýa toparynyň galan dört agzasy çempionatyň netijelerine görä kesgitlener.