Türkmen mekdep okuwçylary Daşkentdäki Halkara himiýa olimpiadasynda kümüş we bürünç medallary gazandylar
Türkmenistanyň ýaş zehinleri halkara derejesindäki bäsleşikde ýene-de bir gezek ýokary başarnyky görkezdiler. 10—19-njy iyul aralygynda Özbegistanyň paýtagty Daşkent şäherinde geçirilen 58-nji Halkara himiýa olimpiadasynda türkmen okuwçylary 1 kümüş we 3 bürünç medala mynasyp boldy.
Türkmenistanyň Bilim ministrliginiň beren maglumatyna görä, abraýly bäsleşige dünýäniň 92 ýurdundan jemi 363 sany iň ukyply mekdep okuwçysy gatnaşdy. Olimpiadada Türkmenistana Aşgabat şäherindäki Saparmyrat Türkmenbaşy adyndaky ýöriteleşdirilen orta mekdep-internatynyň okuwçylardan ybarat ýygyndysy wekilçilik etdi.
Bäsleşigiň netijelerine görä, 11-nji synp okuwçysy Palwan Ilmammedow kümüş medaly eýeledi. 12-nji synp okuwçylary Diýar Döwletow, Aýlar Orunowa we Rustem Jumayew bürünç medallaryň eýeleri boldylar. Bu uly üstünlik ýurdumyzda ýaş nesilleriň ylym almagy we bilimi özleşdirmegi üçin döredilýän giň mümkinçilikleriň aýdyň subutnamasydyr.
