Türkmen talyplary Müsüriň ýokary okuw mekdeplerinde okap bilerler
2026-njy ýylyň 28-nji aprelinde Türkmenistanyň bilim ministri J.Gurbangeldiýew bilen Müsür Arap Respublikasynyň täze bellenen ilçisi Hamdy Şaaban Abdelhalim Mohamediniň arasynda geçirilen duşuşyk iki ýurduň bilim ulgamyndaky gatnaşyklarynda täze başlangyçlara ýol açdy.
Duşuşykda diňe bir talyplaryň däl, eýsem mugallymlaryň hem tejribe almasy boýunça birnäçe teklipler öňe sürüldi:
- Türkmen talyplaryna Müsüriň ýokary okuw mekdeplerinde bilim almak üçin ýörite ýerleriň hödürlenilmegi meýilleşdirilýär.
- Arap dili we halkara gatnaşyklary ugurlary boýunça bilim alýan talyplar üçin Müsürde gysga möhletli okuwlar guralar.
- Iki ýurduň ylym-bilim merkezleriniň arasynda döwrebap tehnologiýalar we emeli aň (AI) ulgamynda bilelikdäki ylmy-barlag işlerini alyp barmak ara alnyp maslahatlaşyldy.
Müsür tarapy iki ýurduň Bilim ministrlikleriniň hem-de öňdebaryjy ýokary okuw mekdepleriniň arasynda göni gatnaşyklary ýola goýmak üçin wideoaragatnaşyk arkaly duşuşyklary guramagy teklip etdi. Bu ädimler hyzmatdaşlygyň hukuk binýadyny berkidip, täze ikitaraplaýyn resminamalaryň baglaşylmagyna şert döreder.
Türkmenistanyň bilim ulgamynda amala aşyrylýan özgertmeler, esasanam takyk ylymlary we daşary ýurt dillerini okatmagy kämilleşdirmek boýunça alnyp barylýan işler müsürli taraplarda uly gyzyklanma döretdi. Taraplar professor-mugallymlaryň we talyplaryň gatnaşmagynda halkara derejeli seminarlary we forumlary yzygiderli geçirmäge taýýardyklaryny tassykladylar.
