Türkmenistanda diploplary we bilim baradaky resminamalary bermegiň täze tertibi güýje girdi
Türkmenistanda bilim baradaky resminamalary döwlet we daşary ýurt dillerinde resmileşdirmegiň tertibini düzgünleşdirýän täze kadalaşdyryjy hukuk akty güýje girdi. Türkmenistanyň Bilim ministriniň 2026-njy ýylyň 13-nji maýynda çykaran 195-nji belgili Buýrugy bilen degişli düzgünnama tassyklanyldy. Şunuň bilen birwagtda, öň hereket eden 2019-njy ýyldaky 212-nji belgili buýruk güýjüni ýitiren diýlip ykrar edildi.
Täze resminama laýyklykda, ähli döwlet nusgasyndaky diplomlar we bilim baradaky beýleki resminamalar mundan beýläk türkmen ýa-da iňlis dillerinde resmileşdiriler. Diploma goşundy (synp-ekzamen sanawyndan göçürme) asyl nusgada türkmen dilinde taýýarlanylýar, emma uçurymyň ýazmaça arzasy esasynda goşmaça görnüşde iňlis dilinde hem taýýarlanyp bilner.
Täze tertip blanklary doldurmagyň takyk talaplaryny hem kesgitleýär. Blanklary diňe syýaly ýa-da şarjagazly galam bilen el güýji arkaly doldurmaga rugsat berilýär, ýöne düzedişler we öçürmeler gadagan edilýär. Resminamanyň eýesi baradaky maglumatlar pasport maglumatlaryna berk laýyklykda girizilmeli bolup, adyň we familiýanyň iňlis dilinde ýazylyşy daşary ýurt pasportynyň maglumatlaryna doly laýyk gelmelidir.
Düzgünnamada resminama ýitirilen, zaýalanan ýa-da weýran bolan ýagdaýynda onuň dublikatyny (göçürmesini) bermegiň ähmiýetleri hem jikme-jik görkezilendir. Hususan-da, resminama ýitirilen ýagdaýynda, ilki bilen onuň güýjüni ýitirendigi barada gazetde bildiriş çap edilmeli we içerki işler edaralaryndan degişli tassyklama güwänamasy alynmalydyr.
Bilim baradaky resminamalaryň blanklaryny saklamak jogapkärçiligi okuw mekdebiniň ýolbaşçysynyň buýrugy bilen bellenilýän jogapkär işgäriň üstüne ýüklenýär. Blanklar gorag duýduryp-görkeziş ulgamy bilen enjamlaşdyrylan otaglarda, ýanmaýan seýflerde saklanmalydyr. Resminamalaryň hasaba alnyşyny, saklanyşyny we berlişini guramaklyga bolsa okuw mekdebiniň ýolbaşçysy şahsy jogapkärçilik çekýär.
