Şu ýylyň 25 – 30-njy maýy aralygynda Hindistanyň Noida şäherindäki Amity uniwersiteti tarapyndan ýokary synp mekdep okuwçylarynyň arasynda halkara matematika we bilim olimpiadasy guraldy. Bu abraýly bilim bäsleşiginde Türkmenistanyň mekdep okuwçylary uly şadyýanlyk we ýokary taýarlyk görkezip, ýurdumyza birnäçe altyn, kümüş we bürünç medallary getirmegi başardylar.

Türkmenistanly ýaş zehinleriň topary olimpiadanyň çäklerinde matematika, fizika we himiýa dersleri boýunça nazary hem-de barlaghana tapgyrlarynda güýç synaşdylar. Dartgynly geçen bäsleşikleriň netijesinde okuwçylarymyz aşakdaky ýokary sepgitlere ýetdiler:

  • Muhammetmyrat Muhammedow (Matematika dersi boýunça takyk we iňlis dili derslerini çuňlaşdyryp öwredýän ýöriteleşdirilen 6-njy orta mekdebiniň 11-nji synp okuwçysy) — Altyn medal;
  • Mehdi Şemmiýew (Fizika dersi boýunça 79-njy orta mekdebihiň 9-njy synp okuwçysy) — Altyn medal;
  • Halylmyrat Gurbanmyradow (Himiýa dersi boýunça dil derslerini çuňlaşdyryp öwredýän ýöriteleşdirilen 87-nji orta mekdebiniň 11-nji synp okuwçysy) — Altyn we Kümüş medallar;
  • Şatlyk Jumageldiýew (Iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiniň 11-nji synp okuwçysy) — Kümüş we Bürünç medallar;
  • Ýakup Nuryýew (Iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiniň 11-nji synp okuwçysy) — Bürünç medal.

Ýaşlaryň bu halkara ýaryşa ýokary derejede taýarlanmaklaryna we olaryň zehinleriniň açylmagyna «Gujurly Bilim Merkeziniň» tejribeli mugallymlary Dörtguly Gylyjow we Meretguly Gurbanow ýolbaşçylyk etdiler. Türkmen ýaşlarynyň gazanan bu uly ýeňşi ýurdumyzda bilim ulgamyny ösdürmek ugrunda alnyp barylýan özgertmeleriň ýene-de bir aýdyň netijesidir.