Türkmenistanly talyp Abdullla Nazarow Russiýada geçirilen «Ýokary tehnologiýalar çempionaty» atly hünär bäsleşiginde üçünji orna mynasyp boldy.

Ol N.P. Ogarýowyň adyndaky Milli barlag Mordowiýa döwlet uniwersitetiniň 4-nji ýyl talyby bolup, halkara derejedäki bu bäsleşige gatnaşan ilkinji türkmenistanly wekil hökmünde çykyş etdi.

Bäsleşigiň dowamynda Abdullla Nazarow Türkmenistanyň Döwlet baýdagynyň astynda çykyş edip, öz ýurduna wekilçilik etdi.

«Ýokary tehnologiýalar çempionaty» häzirki zaman tehnologiýalary bilen baglanyşykly ýokary isleg bildirilýän ugurlarda talyplaryň we ýaş hünärmenleriň hünär başarnyklaryny görkezmekleri üçin geçirilýän halkara bäsleşikleriň biridir.

Çäräniň çäklerinde emeli aň, inženerçilik ulgamlary we beýleki geljegi uly tehnologik ugurlar boýunça ýaş hünärmenleriň başarnyklary synagdan geçirilýär.

Türkmenistanly talybyň bäsleşikde üçünji orny eýelemegi ýaşlaryň halkara tehnologik ýaryşlara gatnaşmak we öz hünär başarnyklaryny görkezmek mümkinçilikleriniň giňelýändigini görkezýär.