2026-njy ýylyň 10-njy fewralynda Bangkok şäherinde Tailand Patyşasynyň Köşgünde (Amphorn Royal Palace) Ilçi M.Maşalowyň Tailandyň Patyşasy Maha Wajiralongkorna Türkmenistanyň Tailand Patyşalygyndaky Adatdan daşary we Doly ygtyýarly Ilçisi (oturýan ýeri Kuala Lumpur ş.) hökmünde ynanç hatlaryny gowşurmak dabarasy geçirildi. Bu barada Türkmenistanyň DIM-niň web-saýtynda habar berilýär.

Dabaranyň barşynda Ilçi Türkmenistanyň Prezidenti Serdar Berdimuhamedowyň we Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyndan Tailandyň Patyşasyna mähirli salamlaryny we iň gowy arzuwlaryny ýetirdi.

Patyşa Ilçini bu jogapkärçilikli wezipä bellenilmegi bilen gutlap, oňa uly üstünlikleri arzuw etdi. Şeýle hem, özüniň geljekde Türkmenistana saparynyň amala aşyrmak meýliniň bardygyny nygtap geçdi.

Şeýle hem, Türkmenistanyň Tailand Patyşalygy bilen syýasy-diplomatik, söwda-ykdysady we medeni-ynsanperwer ugurlary boýunça hyzmatdaşlygy ösdürmage bolan gyzyklanmasy tassyklanyldy.

Ynanç hatyny gowşuryş dabarasyndan soňra, Tailand Patyşalygynyň Daşary işler ministri Sihasak Phuangketkeo bu ýurda täze bellenen Ilçileri bilen gysgaça gürrüňdeşlik gurnady. Söhbetdeşlikde Tailand Patyşalygynyň Daşary işler ministri Ilçiniň diplomatik işini amal aşyrmakda ýardam we goldaw bermäge taýýardygyny belledi.

Duşuşygyň ahyrynda taraplar Türkmenistan bilen Tailand Patyşalygynyň arasyndaky hyzmatdaşlygy has-da pugtalandyrmak üçin iki ýurduň daşary syýasat edaralarynyň derejesinde yzygiderli gatnaşyklary saklamak babatynda ylalaşdylar.