Türkmenistanyň lukmançylyk biliminde innowasion ädim: Sanly tehnologiýalar we simulýatorlar ornaşdyrylýar
Myrat Garryýew adyndaky Türkmenistanyň Döwlet lukmançylyk uniwersitetiniň wekiliýeti Russiýa Federasiýasynyň Kazan şäherine amala aşyran saparynyň çäklerinde lukmançylyk bilimini sanlylaşdyrmak boýunça möhüm gepleşikleri geçirdi. Türkmen hünärmenleri lukmançylyk simulýatorlaryny öndürmekde dünýäde öňdebaryjy orunlary eýeleýän «MedVision» we «EIDOS Medicine» kompaniýalarynyň ýolbaşçylary bilen duşuşyp, ýokary tehnologiýaly okuw enjamlaryny ýurdumyza ibermegiň mümkinçiliklerini giňişleýin ara alyp maslahatlaşdylar.
Bu işjeň sapar Kazan şäherinde guralan Aziýa uniwersitetleri assosiasiýasynyň VII gurultaýyna hem-de «IFTE-2026» Halkara pedagogik bilim forumyna gabat geldi. Halkara forumyň dowamynda Türkmenistanyň Döwlet lukmançylyk uniwersitetiniň rektory Nabat Myratnazarowa çykyş edip, ýurdumyzda lukmançylyk kadrlandyryş ulgamyna emeli aňy, innowasion sanly platformalary we amaly simulýasiýa tehnologiýalaryny ornaşdyrmagyň anyk hem-de netijeli usullaryny subutnamalar esasynda hödürledi.
Munuň bilen birwagtda, Kazan federal uniwersitetiniň rektory Lenar Safin hem-de Psihologiýa we bilim institutynyň direktory, professor A. Kalimullin bilen hem ýokary derejeli duşuşyklar geçirildi. Onda taraplar kliniki kafedralaryň mugallymlarynyň hünär derejesini ýokarlandyrmak boýunça ýörite maksatnamalary işläp taýýarlamagy, şeýle hem IT çözgütleri esasynda döwrebap okuw enjamlaryny bilelikde öndürmegiň geljekki mümkinçiliklerini maslahatlaşdylar.
Guralan halkara çäräniň çäklerinde Aziýa uniwersitetleri assosiasiýasynyň täze ýolbaşçysyny saýlamak meselesine hem seredildi. Geňeşiň biragyzdan goldamagy bilen, Al-Farabi adyndaky Gazagystanyň milli uniwersitetiniň rektory Žanseit Tuýmebaýew bu halkara assosiasiýanyň täze ýolbaşçysy wezipesine saýlanyldy.
