Ylym — ösüşleriň we innowasiýalaryň binýady
Türkmenistanyň ylym ulgamynda soňky ýyllarda gazanylýan üstünlikler ýurduň ylmy-tehniki kuwwatynyň yzygiderli artýandygyny görkezýär. Döwlet derejesinde ylym-bilimi ösdürmäge gönükdirilen giň gerimli özgertmeler, täzeçil taslamalar we halkara hyzmatdaşlyk türkmen alymlarynyň öňünde täze mümkinçilikleri açýar.
Gahryman Arkadagyň başyny başlan hem-de hormatly Prezidentimiz tarapyndan üstünlikli dowam etdirilýän döwlet syýasatynyň çäklerinde ylmy ösdürmek ileri tutulýan ugurlaryň biri hökmünde kesgitlenildi. Bu ugurda kabul edilen «Türkmenistanda ylym ulgamyny ösdürmegiň 2024—2052-nji ýyllar üçin strategiýasy» ylmy gözlegleriň netijeliligini ýokarlandyrmaga, täze tehnologiýalary işläp taýýarlamaga we innowasion ösüşleri goldamaga giň mümkinçilik döredýär.
Türkmen alymlarynyň gazanýan üstünlikleri halkara derejede hem ykrar edilýär. Muňa Türkmenistanyň Ylymlar akademiýasynyň Tehnologiýalar merkezine «Halkara ylmy-tehnologiki park» derejesiniň berilmegi aýdyň şaýatlyk edýär. Bu dereje ýurduň ylmy edaralarynyň daşary ýurtlaryň öňdebaryjy ylmy merkezleri bilen hyzmatdaşlygyny has-da giňeltmäge şert döredýär.
Ýurdumyzyň gündogar sebitinde ýerleşýän Seýitnazar Seýdi adyndaky Türkmen döwlet mugallymçylyk instituty hem ylmy gözlegleriň işjeň alnyp barylýan merkezleriniň biridir. Institutyň alymlary bilim, önümçilik, ekologiýa, suw serişdelerini rejeli peýdalanmak ýaly ugurlarda ylmy-barlag işlerini alyp barýarlar we olaryň netijelerini amaly durmuşa ornaşdyrýarlar.
Ylym ojagynda ýokary hünärli alymlar zähmet çekip, ýaş nesli ylmy gözleglere çekmek boýunça hem netijeli işleri durmuşa geçirýärler. Institutyň professor-mugallymlary talyplara we mekdep okuwçylaryna maslahat berip, olary ylmy taslamalara hem-de täze açyşlara ugrukdyrýarlar.
Şeýle hem institut Russiýanyň, Özbegistanyň, Gazagystanyň, Täjigistanyň, Belarusyň, Türkiýäniň we Hytaýyň ylmy edaralary bilen hyzmatdaşlyk edip, tejribe alyşmak we bilelikdäki ylmy taslamalary amala aşyrmak boýunça işleri üstünlikli dowam etdirýär.
Ylym jemgyýetiň ösüşiniň möhüm hereketlendiriji güýji bolup durýar. Täze açyşlar we ylmy gözlegler ykdysadyýetiň dürli pudaklarynyň kämilleşmegine, innowasion önümçilikleriň döredilmegine we adamlaryň ýaşaýyş derejesiniň ýokarlanmagyna ýardam edýär. Şonuň üçin hem türkmen alymlarynyň gazanýan üstünlikleri ýurduň geljekki ösüşleri üçin ygtybarly binýat bolup hyzmat edýär.
