«Al-Nasr» Ronaldusiz Turkmanistonning «Arkadagʻ» jamoasini magʻlub etib, Osiyo Chempionlar Ligasida muvaffaqiyat qozondi

Osiyo Chempionlar Ligasi 1/8 finali javob uchrashuvida Saudiya Arabistonining «Al-Nasr» jamoasi va Turkmanistonning «Arkadagʻ» klubi toʻqnash keldi. Riyod shahridagi «Kingdom Arena» stadionida boʻlib oʻtgan oʻyin 1:0 hisobida mezbonlarning gʻalabasi bilan yakunlandi.

Oʻyindagi yagona gol uchrashuvning dastlabki daqiqalarida kiritildi. Saudiya Arabistoni jamoasi hujumchisi Abdulrahman Gʻarib gol muallifiga aylandi. Portugaliyalik yulduz Krishtianu Ronaldu ushbu oʻyin qaydnomasiga kiritilmadi. «Al-Nasr» tarkibidagi baʼzi asosiy legionerlarga dam berildi.

Ikki jamoa oʻrtasidagi birinchi uchrashuvda ham saudiyliklar 1:0 hisobida gʻalaba qozonishgan edi. Shunday qilib, «Al-Nasr» ikki oʻyin natijasiga koʻra musobaqaning keyingi bosqichiga yoʻl oldi.