«Ayol diplomatlarning jamiyatdagi o‘rni va ularning erishgan yutuqlari» mavzusida interaktiv muloqot bo‘lib o‘tdi

2026-yil 10-mart kuni Turkmaniston Tashqi ishlar vazirligi Xalqaro munosabatlar institutida Markaziy Osiyo yosh diplomatlari va davlat xizmatchilari uchun ikkinchi o‘quv seminari doirasida «Ayol diplomatlarning jamiyatdagi o‘rni va ularning erishgan yutuqlari» mavzusida interaktiv muloqot o‘tkazildi. Bu haqda Turkmaniston TIV veb-saytida xabar beriladi.

BMTning Turkmanistondagi Doimiy koordinatori vakolatxonasi bilan hamkorlikda tashkil etilgan ushbu tadbirda xorijiy davlatlar va xalqaro tashkilotlarning Turkmanistondagi vakolatxonalari xodimlari, xalqaro tuzilmalarning ayol xodimlari, Tashqi ishlar vazirligi vakillari, institutning ayol o‘qituvchilari hamda talaba qizlari ishtirok etdi.

Anjuman davomida Turkmaniston Tashqi ishlar vaziri o‘rinbosari Mahri Bashimova, Falastin Davlatining Turkmanistondagi Favqulodda va Muxtor elchisi Rana Abu Hijleh, Pokiston Islom Respublikasining Turkmanistondagi Favqulodda va Muxtor elchisi Faryal Legari, BMT Taraqqiyot dasturining Turkmanistondagi Doimiy vakili Narine Saakyan hamda YUNESKO ishlari bo‘yicha Turkmaniston Milliy komissiyasi mas’ul kotibi Chinar Rustamova so‘zga chiqdilar.

Nutqlarda Turkmanistonning doimiy Neytrallik siyosatining ahamiyatiga alohida e’tibor qaratilib, bu siyosat tinchliksevar tashabbuslarni ilgari surishda va xalqaro munosabatlarda ishonchli muloqotni yo‘lga qo‘yishda namunali ekanligi ta’kidlandi. Qayd etilganidek, Neytrallik tamoyillariga asoslangan «Muloqot — tinchlik kafolati» tamoyili ayollarning diplomatiyadagi o‘rnini yanada mustahkamlab, ularning mintaqada tinchlikni ta’minlashdagi tashabbuslarini qo‘llab-quvvatlaydi.