Baxtli davrning baxtiyor onasi

Ona! Ona deganda, avvalo, mehr-muhabbatga chulg‘angan ahil oila, baxtli xonadon hamda bahor go‘zalligi ko‘z oldimizda gavdalanadi. Chunki ona xuddi Quyosh kabi o‘z xonadoniga nur sochib, harorat ulashuvchi, bahor kabi atrofga ko‘rk beruvchi muqaddas zotdir. Onalar — dunyoning mehr kuyi, tuganmas qo‘shig‘idir. Xalqaro xotin-qizlar bayrami arafasida yoshlar uchun namuna maktabiga aylangan mo‘tabar onalarning taqdiri va mazmunli umr yo‘li haqida so‘z ochish juda yoqimlidir.

Xojambaz tumanining Beshir shaharchasida istiqomat qiluvchi Durdi Saparova o‘z oilasining faxri va g‘ururidir. U 1932-yilda uch farzandli oilaning ikkinchi farzandi bo‘lib dunyoga kelgan. Durdi Saparova o‘rta ta’limni o‘z qishlog‘idagi 2-sonli maktabda olgan. Mehnatsevarligi va ona tuproqqa bo‘lgan ixlosi uni hali o‘n ikki yoshidayoq mehnat yo‘liga boshladi. Uning yoshligi Ikkinchi jahon urushi yillariga to‘g‘ri keldi. Qishloq erkaklari urushga ketgach, og‘ir mehnat ayollar zimmasiga tushdi. Durdi Saparova boshqa ayollar bilan birga kunduzlari dalada ishlab, kechalari front uchun jundan paypoq va qo‘lqoplar to‘qiganini, chiroq yorug‘ida gilamlar to‘qiganini so‘zlab beradi. Urushda qatnashib, Vatan himoyasining yuksak namunasini ko‘rsatgan Hezzi Gochov bilan turmush qurganidan so‘ng, u dehqon birlashmasida mehnat qila boshladi. Halol mehnati va tuproqqa bo‘lgan sadoqati uchun u bir necha bor mukofotlarga sazovor bo‘ldi.

«Daraxt mevasi bilan, inson bolasi bilan taniladi» deganlaridek, hozirgi kunda mo‘tabar onaning 3 o‘g‘il va 4 qizidan 36 nabira, 88 chevara va 5 evarasi bor. Shunday katta baxt egasi bo‘lgan ona ularning kamolini ko‘rib, tinch-omon zamonaning rohatini surmoqda. Uning nuroniy yuzida va muloyim tabassumida oila ahilligini, farzandlariga bo‘lgan muhabbatini va osuda hayotdan mamnunligini ko‘rish mumkin. Qishloqdoshlari va qarindoshlari yoshi bir asrga yaqinlashib qolganiga qaramay, Durdi Saparovaning g‘ayratiga qoyil qoladilar. U hali-hanuz nabira va chevaralariga, qo‘ni-qo‘shnilariga xalqimizning qadimiy gilamchilik, to‘quvchilik va kashtachilik san’ati sirlarini o‘rgatib kelmoqda.

Durdi ona Qahramon Arkadag‘imiz va Arkadag‘li Qahramon Serdarimizning Vatanimiz ravnaqi va xalqimiz farovonligi yo‘lidagi xayrli ishlaridan faxrlanadi. U ushbu ajoyib davrning ne’matlari umrga umr qo‘shishini ta’kidlaydi.

Muhtaram Prezidentimiz «Yoshlar — Vatanning tayanchi» kitobida ta’kidlaganidek: «Ahillik, mehnatsevarlik, keksalarimizga hurmat-ehtirom ko‘rsatish xalqimizning asrlar davomida hayot qoidasiga aylangan». Shu sababli, qishloqda kim o‘g‘il uylantirsa yoki qiz chiqarsa, albatta, ushbu mo‘tabar onaning oq fotihasini oladi.

— Hozirgi kunda Qahramon Arkadag‘imiz va Arkadag‘li Qahramon Serdarimizning sa’y-harakatlari bilan farovon davrning rohatini ko‘rib yashayapmiz. Bunday davrning qadriga yetib yashash, tinch Vatanimizning tonggi musaffo havosidan bahra olish biz uchun eng katta baxtdir, — deydi baxtiyor ona Durdi Saparova.