Markaziy Osiyo mamlakatlari, Italiya va Ozarbayjon qishloq xo‘jaligi sohasidagi hamkorlikni kengaytirishga kelishib oldilar

Markaziy Osiyo mamlakatlari, Italiya va Ozarbayjon qishloq xo‘jaligi hamda agrosanoat tarmog‘idagi hamkorlikni yangi bosqichga olib chiqishga qaratilgan muhim kelishuvlarga erishdilar. Tegishli kelishuvlar dushanba kuni Toshkentda bo‘lib o‘tgan “Italiya – Markaziy Osiyo (C5) + Ozarbayjon” xalqaro agrobiznes forumining yakuniy Bayonotida mustahkamlandi. Bu haqda O‘zbekiston Respublikasi Qishloq xo‘jaligi vazirligi xabar bermoqda.

Forumda Italiya qishloq xo‘jaligi, oziq-ovqat suvereniteti va o‘rmon xo‘jaligi vaziri Franchesko Lollobridjida, Ozarbayjon qishloq xo‘jaligi vaziri Mejnun Mamedov, Qozog‘iston qishloq xo‘jaligi vaziri o‘rinbosari Yermek Kenjexanuli, Tojikiston qishloq xo‘jaligi vaziri Qurbon Hakimzoda, Qirg‘iziston suv resurslari, qishloq xo‘jaligi va qayta ishlash sanoati vaziri o‘rinbosari Almaz Jeenaliyev hamda Turkmaniston qishloq xo‘jaligi vaziri o‘rinbosari Berkeli Berkeliyev ishtirok etmoqdalar.

Forum davomida qishloq xo‘jaligi, investitsiyalar va oziq-ovqat xavfsizligi bilan bog‘liq masalalar muhokama qilindi. Ishtirokchilar innovatsiyalarni faol joriy etish, yer va suv resurslaridan samarali foydalanish, shuningdek, iqlim o‘zgarishiga moslashish bo‘yicha yechimlarni ishlab chiqish zarurligini ta’kidladilar.

Xabarda qayd etilishicha, tomonlar ushbu yo‘nalishlarda hamkorlikni kuchaytirish barqaror agroekotizimlarning shakllanishiga hamda mintaqada oziq-ovqat xavfsizligini ta’minlashga xizmat qilishini ta’kidladilar.

Forum davomida mintaqalararo va xalqaro hamkorlikni kengaytirishga, investitsiyalarni jalb qilishga hamda ilg‘or texnologiyalarni joriy etish va tajriba almashishni rivojlantirishga alohida e’tibor qaratildi.

Italiya, Markaziy Osiyo mamlakatlari va Ozarbayjon ishtirokida o‘tkazilayotgan “Barqaror qishloq xo‘jaligi ekotizimlari uchun innovatsiyalar, regenerativ qishloq xo‘jaligi va raqamlashtirish” mavzusidagi xalqaro biznes-forum 24-martga qadar davom etadi.