Matbuot anjumani: «Ashxobod – Tbilisi: gʻoyalar va yangi imkoniyatlar oʻrtasidagi jonli koʻprik»

2026-yil 17-fevral kuni Turkmanistonning Gruziyadagi Elchixonasida Gruziya ommaviy axborot vositalari vakillari uchun 2026-yilning «Mustaqil, doimiy Betaraf Turkmaniston – bedov otlar va maqsadlar makoni» shioriga bagʻishlangan brifing oʻtkazildi.

Brifingda «1TV» birinchi telekanali, «Obyektiv» telekanali, «The Georgian Business Week» ishbilarmonlik nashri, «Europe 24» media-xoldingi, «Georgia Press» tashkiloti, «News Day Georgia» axborot agentligi, «Geoecohub» onlayn nashri, «Rezonans», «Koʻp millatli Gruziya», «Ozod Gruziya», «Komsomolskaya pravda», «Vecherniy Tbilisi», «Vrastan» gazetalari jurnalistlari va Gruziyaning «Geocase» tahliliy markazi vakillari ishtirok etishdi.

Turkmanistonning Gruziyadagi Elchisi D.Seyitmammedov oʻz chiqishida 2026-yil shiori milliy taraqqiyot yoʻnalishlarini, xalq jipsligini va axaltaka otlarining Turkmanistonning taraqqiyot hamda yuksak marralarga boʻlgan intilishi ramzi sifatidagi oʻrnini aks ettirishini taʼkidladi.

Brifing davomida ishtirokchilarga Turkmaniston hurmatli Prezidenti Serdar Berdimuhamedovning «Turkmaniston Betarafligi — tinchlik va ishonchning porloq yoʻli» nomli kitobi tanishtirildi. Kitobda turkman Betarafligining shakllanish bosqichlariga va umumbashariy tinchlik, xavfsizlik hamda barqaror rivojlanishni taʼminlash boʻyicha BMT Bosh Assambleyasining tegishli rezolyutsiyalari bilan uch marta eʼtirof etilgan mamlakat huquqiy maqomining ahamiyatiga alohida eʼtibor qaratilgani taʼkidlandi.

Elchi turkman-gruzin hamkorligi haqida ham toʻxtalib oʻtdi. U yuqori darajadagi tashriflarning faol rivojlanishi izchil va uzoq muddatli hamkorlik uchun yangi imkoniyatlar ochib, ikki tomonlama munosabatlarga qoʻshimcha turtki berayotganini qayd etdi.

«The Georgian Business Week» nashri bosh muharriri V.Miroshnichenko Turkmanistonga bagʻishlangan jurnalning navbatdagi sonini taqdim etdi. U ushbu jurnal oʻquvchilar ommasiga Turkmaniston bilan, shuningdek, ikki xalq doʻstligi va farovonligini mustahkamlashga xizmat qilayotgan va jadal suratlar bilan rivojlanayotgan turkman-gruzin hamkorligi bilan yaqindan tanishish imkonini berishini aytdi.

Gruziyada xizmat koʻrsatgan jurnalist, professor B.Nachkebiya Turkmaniston hurmatli Prezidenti tomonidan amalga oshirilayotgan, dunyoda tinchlikni mustahkamlashga, xalqlar oʻrtasida doʻstona va birodarlik munosabatlarini rivojlantirishga yordam beradigan Betaraflik siyosatining ahamiyatini taʼkidladi. U Betaraflik umumbashariy barqarorlik va xavfsizlikni taʼminlashning, tinchliksevar tashabbuslarni amalga oshirishning, shuningdek, muhim masalalarni oʻzaro ishonch, muloqot hamda masʼuliyat asosida muhokama qilish va hal etishning muhim vositasi ekanligini qayd etdi.