Qozog‘iston Turkmaniston chegarasigacha bo‘lgan yangi yo‘l qurilishini shu yil yakunlaydi

Qozog‘iston joriy yilda mamlakatni Turkmaniston bilan bog‘laydigan avtomobil yo‘li qurilishini yakunlaydi. Bu haqda Qozog‘iston transport vaziri Nurlan Sauranbayevning so‘zlariga tayanib, «Lsm» qozoq sayti xabar berdi.

Vazir N. Sauranbayev «Turkmaniston — Rossiya» transport koridori qurilishi haqida to‘xtalib, ushbu o‘tish yo‘li «Temir-Bobo — Rossiya Federatsiyasi chegarasi» qismini ham o‘z ichiga olishini ta’kidladi.

«"Janaozen — Turkmaniston chegarasi" yo‘l qismida qurilish ishlari olib borilmoqda. Shu bilan birga, yo‘lni to‘rt qatorli qilish bo‘yicha texnik-iqtisodiy asoslash (TIA) loyihasini ishlab chiqish ham boshlandi. Hozirgi qismdagi qurilish ishlari shu yil davomida yakunlanadi», — dedi vazir.