Raqamli Hindiston: Sun’iy intellekt kelajagi

Hindiston ma’lumotlar markazlariga 200 milliard AQSH dollarigacha investitsiya jalb qilishni rejalashtirib, sun’iy intellekt bo‘yicha dunyo markaziga aylanishga intilmoqda. Elektronika va axborot texnologiyalari vaziri Ashvini Vaishnav mamlakat ochiq va hamyonbop yechimlarni taklif qilish orqali Global Janub davlatlari uchun sun’iy intellekt sohasida ishonchli hamkor sifatida o‘zini namoyon etayotganini ta’kidladi.

Yirik texnologiya kompaniyalari allaqachon Hindistonning sun’iy intellekt infratuzilmasiga ulkan sarmoyalar kiritishini e’lon qildi. 2025-yil oktabr oyida “Google” kompaniyasi Andhra-Pradesh shtatining Vishakhapatnam shahrida sun’iy intellekt markazini tashkil etish uchun besh yil davomida 15 milliard AQSH dollari miqdorida sarmoya kiritishni rejalashtirayotganini xabar qildi. Ushbu loyiha 1 gigavatt quvvatga ega ma’lumotlar markazi qurilishi, yangi xalqaro suvosti kabeli va optik tolali tarmoqning kengaytirilishini o‘z ichiga oladi.

2025-yil dekabr oyida “Microsoft” kompaniyasi Osiyodagi eng yirik sarmoyasini e’lon qilib, to‘rt yil davomida Hindistonning bulutli va sun’iy intellekt infratuzilmasini rivojlantirishga 17,5 milliard AQSH dollari miqdorida sarmoya kiritishini aytdi. “Amazon” ham 2030-yilgacha o‘z biznesini kengaytirish va sun’iy intellektga asoslangan raqamlashtirishga e’tibor qaratish uchun mamlakatga 35 milliard AQSH dollari sarmoya kiritish majburiyatini oldi.

Ushbu o‘sishni qo‘llab-quvvatlash uchun Hindiston 38 mingdan ortiq grafik protsessorli (GPU) umumiy hisoblash markazlari kabi infratuzilmalarni qurmoqda va sarmoyalarni jalb qilish uchun soliq imtiyozlarini taklif qilmoqda. Mamlakat strategiyasi hind tillariga va mahalliy ehtiyojlarga moslashtirilgan asosiy sun’iy intellekt modellarini ishlab chiqishni, sun’iy intellekt yo‘nalishida ta’lim berishni va xodimlarning malakasini oshirishni, shuningdek, innovatsiyalarni cheklamagan holda xatarlarni tartibga soluvchi siyosiy asos yaratishni o‘z ichiga oladi.

Hindiston o‘z taraqqiyot modelida barchani qamrab olish va barqarorlikni targ‘ib qilish orqali sun’iy intellekt sohasida jahon standartlarini shakllantirishda muhim o‘rin egallashga harakat qilmoqda. Hududdagi 5G tarmog‘ining qamrovi va yosh aholining ko‘pligi mamlakatda sun’iy intellektning tezkor joriy etilishiga yordam bermoqda.