Rossiya oliy ta’lim muassasalari 1-sentabrdan yangi ta’lim modeliga o‘tadi

2026 yil 1-sentabrdan Rossiyaning oliy ta’lim muassasalari amaldagi “bakalavriat — magistratura” tizimini almashtiradigan yangi ta’lim modeliga to‘liq o‘tadi. Bu haqda «MIR-24» xabar beradi, manba sifatida «RIA Novosti» agentligiga tayanadi.

Yangi qoidalarga ko‘ra, oldingi “bakalavr — magistr” shakli o‘rniga asosiy oliy ta’lim va ixtisoslashgan oliy ta’lim joriy etiladi. Asosiy oliy ta’lim muddati tanlangan mutaxassislikka qarab 4 yildan 6 yilgacha bo‘ladi. Ixtisoslashgan oliy ta’lim 1 yildan 3 yilgacha davom etadi va professional, boshqaruv va ilmiy-tadqiqot yo‘nalishlarini o‘z ichiga oladi.

Asosiy yangiliklardan biri moliyaviy shartlar bilan bog‘liq. Avvalgi tizimda mutaxassislik darajasini tamomlagan bitiruvchilar magistraturada davlat byudjeti asosida bepul o‘qiy olmagan bo‘lsa, endi bu cheklov bekor qilindi. Har bir asosiy ta’lim bitiruvchisi davlat moliyalashtiradigan o‘quv o‘rinlari uchun da’vogar bo‘la oladi. Aspirantura esa professional ta’limning alohida darajasi sifatida belgilanadi.

Mutaxassislar qayd etishicha, bu o‘zgarishlar chuqur nazariy bilim va amaliy tajriba talab qiladigan muhandislik va ilmiy dasturlar uchun alohida ahamiyatga ega. Yangi model universitetlarga ta’lim standartlarini saqlash bilan birga, dasturlarni mehnat bozorining haqiqiy talablariga moslashtirish imkonini beradi.

O‘tish jarayoni 2022 yilda Boloniya tizimidan voz kechish va milliy ta’lim tizimini takomillashtirish bo‘yicha boshlangan ishlarning davomidir. Olti universitetda pilot loyihaning muvaffaqiyatli yakunlanishidan so‘ng, tajriba mamlakatning barcha universitetlariga tatbiq etiladi.