Saudiya Arabistoni Turkmanistonga 5 tonna xurmo topshirdi

18-fevral kuni Saudiya Arabistonining Ashxoboddagi elchixonasi binosida Turkmaniston Hukumatiga insonparvarlik sovg‘asi — hijriy 1447-yil hosili bo‘lgan 5 tonna xurmoni topshirish marosimi bo‘lib o‘tdi.

Sovg‘a Ikki Muqaddas Haram xizmatchisi, Salmon bin Abdulaziz Ol Saud nomidan topshirildi. Xurmolar umumiy og‘irligi 5 tonna bo‘lgan 625 ta qutiga qadoqlangan.

Tantanali tadbirda elchixona maslahatchisi, diplomatik vakolatxona rahbari o‘rinbosari Naif bin Saud Al-Sahli, Qirollik Islom ishlari, da’vat va irshod vazirligi vakili Talal Al-Maliki, shuningdek, Turkmaniston Muftiyligi vakillari ishtirok etdilar.

Tadbir davomida Naif bin Saud Al-Sahli Turkmaniston Muftiyligi vakillari bilan uchrashdi. Ular ikki davlat o‘rtasidagi do‘stlik va birodarlik ramzi bo‘lgan saxovatli sovg‘a uchun Saudiya Arabistoni Hukumatiga minnatdorchilik bildirdilar. Shuningdek, turkman tomoni har yili Haj amallarini bajarishda turkman ziyoratchilariga ko‘rsatilayotgan qo‘llab-quvvatlash va yordam uchun tashakkur aytdi.