Turkiyada choy ishlab chiqarishdan qoladigan chiqindilarni ko‘mir, hasharotlarga qarshi vositalar va organik o‘g‘itlar ishlab chiqarish uchun qayta ishlash yo‘lga qo‘yildi. Ushbu jarayonda kislorodsiz muhitda yuqori harorat ta’sirida organik moddalarni parchalashga asoslangan piroliz usulidan foydalaniladi.

«Вести Кавказа» nashrining 2026-yil 12-oktabrda e’lon qilgan xabariga ko‘ra, bu haqda Turkiyaning Rize viloyati gubernatori o‘rinbosari Abdülkadir Öksüz ma’lum qildi.

Uning aytishicha, hozirda Çaydalı savdo belgisi ostida sertifikatlangan mahsulotlarning uch turi ishlab chiqarilmoqda. Kelgusida korxonalarda oyiga 500–550 tonna ko‘mir ishlab chiqarish rejalashtirilgan. Organik o‘g‘itlar va zararli hasharotlarga qarshi qo‘llaniladigan vositalar ishlab chiqarish ham kengaytirilmoqda.

Turkiyada ishlab chiqarilayotgan mahsulotlarga xorijda ham qiziqish bildirilmoqda. Germaniya ushbu mahsulotlarni o‘rganishga qiziqish bildirgan, Buyuk Britaniya va Ruminiya esa ularning sinov partiyalarini xarid qilgan. Abdülkadir Öksüzning ta’kidlashicha, organik o‘g‘itlarni mamlakat ichida ishlab chiqarishni rivojlantirish Turkiyaning tegishli mahsulotlar importiga qaramligini kamaytirishga imkon beradi.

Loyihaning yana bir muhim jihati — choy ishlab chiqarish jarayonida hosil bo‘ladigan biologik chiqindilarni foydali mahsulotlarga aylantirishdir. Turkiyada yiliga taxminan 1,2 million tonna choy ishlab chiqariladi. Ushbu hajmning 70–100 ming tonnasini ishlab chiqarish chiqindilari tashkil etadi.

Turkiya bu yo‘nalishda to‘plangan tajribasini Ozarbayjon choy ishlab chiqaruvchilari bilan bo‘lishishga ham tayyor ekanini bildirdi. Shuningdek, ikki mamlakat o‘rtasida qo‘shma korxonalar tashkil etish imkoniyati muhokama qilinmoqda.

Choy ishlab chiqarish chiqindilarini qayta ishlash tabiiy resurslardan samarali foydalanish, chiqindilar hajmini kamaytirish va qishloq xo‘jaligi uchun zarur mahsulotlarni ishlab chiqarishning qo‘shimcha manbalarini yaratishga yordam berishi mumkin.