Turkmanboshi va Boku portlarini muvofiqlashtirilgan holda rivojlantirish masalalari muhokama qilindi

“AZCON” xoldingi tarkibiga kiruvchi “Ozarbayjon temir yo‘llari” (ADY) yopiq aksiyadorlik jamiyati raisi Rovshan Rustamov Turkmanistonga rasmiy tashrifi doirasida Turkmanboshi xalqaro dengiz portiga tashrif buyurdi. Bu haqda Ozarbayjon elchixonasi saytida xabar berilgan.

Port direktori Paraxat Jumayev Ozarbayjon delegatsiyasini Turkmanboshi xalqaro dengiz portining mavjud infratuzilmasi, texnik imkoniyatlari va tranzit salohiyati bilan tanishtirdi.

Uchrashuv davomida tomonlar Turkmanboshi xalqaro dengiz portining mintaqadagi yuk tashishni rivojlantirishdagi o‘rni, shuningdek, Boku xalqaro dengiz savdo porti va Turkmanboshi xalqaro dengiz portini rivojlantirish rejalarini muvofiqlashtirish masalalarini muhokama qildilar. Dengiz tubini chuqurlashtirish bo‘yicha olib borilayotgan ishlarga alohida e’tibor qaratildi.

Muzokara ishtirokchilari Kaspiy va Qora dengizlar o‘rtasidagi aloqalarning kengayishi yuk aylanmasining oshishiga va O‘rta koridor samaradorligining yuksalishiga xizmat qilishini ta’kidladilar.

Shuningdek, tomonlar Yevroosiyo transport koridori yo‘nalishida joylashgan portlar o‘rtasidagi uyg‘unlashgan harakatlar O‘rta koridor orqali samarali, tez va xavfsiz yuk tashishni ta’minlashda asosiy shart ekanligini qayd etdilar.

Eslatib o‘tamiz, avvalroq “Ozarbayjon temir yo‘llari” YAJ raisi Rovshan Rustamov Ashxobodda bo‘lib o‘tgan to‘rt tomonlama uchrashuvda ishtirok etgani haqida xabar bergan edik.