Turkmaniston universitetida Zimbabve delegatsiyasi ishtirokida o‘quv mashg‘uloti o‘tkazildi

Xalqaro gumanitar fanlar va rivojlanish universitetida (IUHD) Zimbabve Respublikasining Tashqi ishlar va xalqaro savdo bo‘yicha Doimiy kotibi ishtirokida o‘quv mashg‘uloti bo‘lib o‘tdi. Turkmaniston Bilim vazirligi saytida xabar berilishicha, ushbu mashg‘ulot talabalar va o‘qituvchilarda katta qiziqish uyg‘otdi hamda zamonaviy xalqaro munosabatlarning muhim masalalariga bag‘ishlandi.

Mashg‘ulot davomida so‘zga chiqqan mehmon ikki davlat o‘rtasidagi hamkorlik imkoniyatlari, diplomatik aloqalarni mustahkamlash usullari, shuningdek, hozirgi davrda iqtisodiy va gumanitar hamkorlikning ahamiyati haqida batafsil so‘zlab berdi. Xususan, davlatlar o‘rtasidagi o‘zaro ishonchga asoslangan muloqot, teng huquqli hamkorlik va xalqaro savdoning barqaror rivojlanishni ta’minlashdagi o‘rni ta’kidlandi. Bunday uchrashuvlar yosh mutaxassislarning xalqaro munosabatlar sohasidagi bilimlarini kengaytirishda muhim ahamiyatga ega ekanligi qayd etildi.

O‘quv mashg‘uloti davomida xalqaro munosabatlar yo‘nalishida tahsil olayotgan talabalar mehmonlarga o‘zlarini qiziqtirgan savollar bilan murojaat qildilar hamda davlatlararo hamkorlikning istiqbolli yo‘nalishlari, mintaqaviy hamkorlik imkoniyatlari va xalqaro tashkilotlarning o‘rni haqida fikr almashildi.